ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ އޮފީސް ހިންގުމަށްޓަކައި ކުއްޔަށް ނަގާފައިވާ އިމާރާތުގެ ދެ ފްލޯގައި މޯލްޑިވްސް މީޑިއާ ހައުސް ޕްރައިވެޓް ލިމިޓެޑްއިން "އެމްއެމްޓީވީ" ހިންގުމަށް ހަދައިފައިވާ އެއްބަސްވުން ނިމުމަކަށް ގެންނަން އެންސްޕާ އިން ނިންމައިފިއެވެ.
އެންސްޕާއިން މިއަދު ނެރުނު ނޫސްބަޔާނެއްގައި ބުނީ އެ އެޖެންސީ ހިންގާނެ ތަނެއް މޯލްޑިވްސް މީޑިއާ ހައުސް މެދުވެރިކޮށް ހޯދި ކަމަށާއި އެކަން ކުރީ އޯޕަން ޓެންޑާއިން ހުޅުވާލައިގެން ކަނޑައެޅިފައި އޮންނަ އުސޫލުތަކުގެ ތެރެއިން ކަމަށެވެ. ނަމަވެސް އެ އެއްބަސްވުން ހެދިކަން ހާމަވުމާ ގުޅިގެން މީޑިއާ ހައުސްއަށް އެކި ފަރާތްތަކުން ކުރި ތުހުމަތަކާ ގުޅިގެން އެ ކުންފުނީގެ އަގު ވެއްޓޭތީ އެއްބަސްވުން ނިމުމަކަށް ގެންނަން ނިންމީ ކަމަށް އެންސްޕާއިން ވަނީ ބުނެފައެވެ.
އެންސްޕާއިން ބުނީ މި އެއްބަސްވުން ނިމުމަކަށް ގެނައުމަށް ފަހު ފުރިހަމަ ކުރަން ޖެހޭ އިޖުރާއަތްތައް ފުރިހަމަ ކުރުމުގެ މަސައްކަތްތައް ފިނޭންސް މިނިސްޓްރީގެ އިރުޝާދުގެ ދަށުން ކުރިއަށް ގެންދާނެ ކަމަށެވެ.
ފާހަގަކޮށްލެވޭ ގޮތުގައި ސޯޝަލް މީޑިއާގައި ދައުރުވަމުން ދާ ޓެންޑަ ބޯޑުގެ ޑޮކިއުމަންޓުން މ. ސީރާޒީގޭގައި އެންސްޕާ ހިންގަން އެވޯޑް ކޮށްފައި ވަނީ މިދިޔަ އޮގަސްޓް މަހުކަން އެނގެއެވެ. އަދި ފަސް އަހަރު ދުވަހުގެ ކުއްޔަކީ 34.8 މިލިއަން ރުފިޔާކަން އެ ލިޔުމުން އެނގެން އޮވެއެވެ. އެންސްޕާ އަށް އެ އިމާރާތުން ދޫކުރީ 2 ފްލޯއެވެ.
އެ މުއާމަލާތުން އެނގެން އޮންނަ ގޮތުގައި، ފިނޭންސުން ކުއްޔަށް ހިފި މޯލްޑިވްސް މީޑިއާ ހައުސް އަކީ މިދިޔަ އަހަރުގެ މާޗް މަހު އުފަންކުރި ކުންފުންޏެވެ. މ. ސީރާޒީ ގެއަކީ އަމިއްލަ ފަރާތެއްގެ އިމާރާތެއް ކަމަށް ވާ އިރު އެ ކުންފުނިން ކުއްޔަށް ނެގި ފްލޯތަކެއް އެންސްޕާއިން ކުއްޔަށް ނެގުމަކީ މައްސަލައެއް ކަމަށް ގިނަބަޔަކު ތުހުމަތު ކުރެއެވެ. އެންސްޕާއިން ވަނީ އެ ތުހުމަތުތައް ދޮގުކޮށް، މައްސަލަ ބަލައިދޭން އެންޓި ކޮރަޕްޝަން ކޮމިޝަން (އޭސީސީ)ގައި އެދިފައެވެ.
ކޮންމެކަމެއްވެސް އެއްމެފަހުން މިޖެހެނީ އުނބަށް