ސިވިލް ސާވިސް އިން ވަކިކޮށް، ބަންޑާރަނައިބުގެ އޮފީސް ވަކި ހިދުމަތަކަށް ހެދުމަށް ރައްޔިތުންގެ މަޖިލީހަށް ބިލެއް މިއަދު ހުށަހަޅައިފިއެވެ.
ބަންޑާރަނައިބުގެ އޮފީސް މިހާރު ހިނގަމުން ދަނީ ސިިވިލް ސާވިސްގެ ދަށުންނެވެ. އެހެންވެ، ސިވިލް ސާވިސްގެ އުސޫލުތައް އެ އިދާރާ އަށް ހިނގައެވެ. އެކަމަކު ގާނޫނުއަސާސީގައިވާ ގޮތުން، ބަންޑާރަނައިބުގެ އޮފީހަކީ މިނިވަން އިދާރާއެކެވެ. އެހެންވެ ސަރުކާރުން ހުށަހެޅީ ސިވިލް ސާވިސް އިން ބަންޑާރަނައިބުގެ އޮފީސް ވަކިކުރުމަށެވެ.
ސަރުކާރު ފަރާތުން މަޖިލީހަށް ހުށަހެޅި ބިލުގައިވާ ގޮތުން ބަންޑާރަނައިބުގެ އޮފީހުގެ މުވައްޒަފުން ދެ ބަޔަކަށް ބެހެއެވެ. އެއީ ގާނޫނީ ހިދުމަތާއި އިދާރީ ހިދުމަތުގެ ބަޔަށެވެ. ބިލުގައިވާ ގޮތުން:
- މުވައްޒަފުންގެ މުސާރަ އާއި އިނާޔަތްތައް ކަނޑައަޅާނީ ޕޭ ކޮމިޝަންގެ ހަމަތަކާ އެއްގޮތަށް ފިނޭންސް މިނިސްޓަރު
- މުވައްޒަފުންނަށް އެކަށީގެންވާ ހެލްތު އިންޝުއަރެންސް ނިޒާމެއްގައި ބައިވެރިކުރުވުމުގެ އިހްތިޔާރު ލިބޭނެ
މި ބިލުގައި ބަންޑާރަނައިބުގެ ޝަރުތުތަކާއި ވާޖިބުތަކާއި ބަންޑާރަނައިބުގެ އޮފީހުގެ މަސްއޫލިއްޔަތުތަކުގެ ތަފްސީލު ބަޔާންކޮށްފައިވެއެވެ.
