ކޮޕީރައިޓްގެ ހައްގުތަކަށް ހިމާޔަތް ލިބިދެވޭ މުއްދަތު 70 އަހަރަށް އިތުރުކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
ސަރުކާރު ފަރާތުން މިދިޔަ ޖުލައި މަހު ކޮޕީރައިޓާއި އެއާގުޅޭ އެހެނިހެން ހައްގުތަކުގެ ގާނޫނަށް ހުށަހެޅި އިސްލާހުގައި ވަނީ ކޮޕީރައިޓުގެ ހިމާޔަތް ލިބިދެވޭ އުފެއްދުންތަކާއި އެ ނޫންވެސް ހައްގުތަކާ ގުޅޭ ކަންކަން ތަފްސީލުކޮށްދީފައެވެ.
މީގެ އިތުރުން، ވިޔަފާރީގެ ފައިދާ ނުލިބޭ ގޮތަށް ދިރާސާކުރުމުގެ ބޭނުމަށް ލިބިދޭ އިސްތިސްނާ ހިމެނޭގޮތުން ކޮޕީރައިޓްކޮށްފައިވާ އުފެއްދުންތައް ކޮޕީކުރެވޭނެ ނުވަތަ ބޭނުންކުރެވޭނެ އިތުރު ހާލަތްތައް ވެސް މި އިސްލާހުގައި ހިމަނާފައިވެއެވެ.
މި އިސްލާހުގައި ދެން ހިމަނާފައިވަނީ ކޮޕީރައިޓްގެ ހައްގުތަކަށް ހިމާޔަތް ލިބިދެވޭ މުއްދަތު 50 އަހަރުން 70 އަހަރަށް އިތުރުކުރުމަށެވެ. އަދި އެއާ ގުޅޭ އިތުރު އުފެއްދުންތަކުގެ ހައްގުތަކަށް ހިމާޔަތް ލިބިދެވޭ މުއްދަތު 25 އަހަރުން 35 އަހަރަށް އިތުރުކުރުމަށް ވެސް ހުށަހަޅާފައިވެއެވެ.
މި އިސްލާހު ފާސްވީ މަޖިލީހަށް ހާޒިރުވި މެންބަރުންގެ ތެރެއިން ވޯޓުގައި ބައިވެރިވި 57 މެންބަރުން ވެސް ވޯޓުދިނީ އިސްލާހު ފާސްކުރަން ފެންނަ ކަމަށެވެ.
