ފަހި ދިރިއުޅުން ކޯޕަރޭޝަން (އެފްޑީސީ) އިން ބޯހިޔާވަހި ކަމުގެ މަޝްރޫއުގެ ދަށުން މާލެ ސަރަހައްދުގައި އިތުރު 13،000 ހައުސިން ޔުނިޓް އެޅުމަށް ނިންމައިފިއެވެ.
ބޯހިޔާވަހިކަމުގެ މަޝްރޫއުތައް ކުރިއަށް ގެންދަން އެފްޑީސީން ބޭރުގެ ތިން ކުންފުންޏަކާ އެކު ފްރޭމްވޯކް އެއްބަސްވުންތަކެއްގައި ސޮއިކޮށްފައި ވާއިރު އޭގެ ތެރެއިން 3،000 ޔުނިޓް އަޅަން ފްރޭމްވޯކް އެއްބަސްވުމުގައި ސޮއިކުރީ ސްރީލަންކާގެ ކުންފުންޏަކާ އެކުއެވެ. އަދި އަނެއް 10،000 ހައުސިން ޔުނިޓް އެޅުމަށް ބޭރުގެ އިތުރު ދެ ކުންފުންޏަކާއި އެކުވެސް ފްރޭމްވޯކް އެއްބަސްވުމެއްގައި ވަނީ ސޮއިކޮށްފައެވެ.
އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ މިމަޝްރޫއު ކުރިއަށް ގެންދާނީ ބޭރުގެ ފަރާތްތަކުގެ ލޯނު އެހީގައި ކަމަށްވާތީ މިހާރު ކުރިއަށްދަނީ މި މަޝްރޫއަށް ބޭނުންވާ ފައިނޭންސް ހޯދުންކަމަށެވެ. އަދި ކުރިއަށް އޮތް ދެ މަސް ދުވަހުގެ ތެރޭގައި އެ މަޝްރޫއުތައް ކުރިއަށް ގެންދިއުމުގެ ހުއްދައަށް އެދޭނެ ކަމަށާއި ހަތަރު މަސް ދުވަހުގެ ތެރޭގައި މި މަޝްރޫއުތައް އިފްތިތާހް ކުރެވިގެން ދާނެ ކަމަށް ހަމްދާން ވިދާޅުވިއެވެ.
އިތުރަށް ހަމްދާން ވިދާޅުވީ ސޯޝަލް ހައުސިން ބޭނުންވާ ކޮންމެ ރަށެއްގައި އެފަދަ މަޝްރޫއުތައް ކުރިއަށް ގެންދިއުމަށް ތައްޔާރަށް ތިބި ކަމަށެވެ.
މިދިޔަ އަހަރު ރައީސް ޑރ.މުހައްމަދު މުއިއްޒު ވަނީ އަންނަ އަހަރު، މާލެ އާއި ރަށްރަށުގައި 27،000 އަށް ވުރެ ގިނަ ހައުސިން ޔުނިޓް އަޅަން ފަށާނެކަމަށް ވިދާޅުވެފައެވެ.
