ވަޒީފާއިން އަލަށް ރިޓަޔާކުރާ މީހުންނަށް މަހުން މަހަށް ދޭ އެލަވަންސް ކަނޑާލަނީ

އަންނަ އަހަރުގެ ޖެނުއަރީން ފެށިގެން ވަޒީފާއިން އަލަށް ރިޓަޔާކުރާ މީހުންނަށް މަހުން މަހަށް ދޭ އެލަވަންސް ކަނޑާލަންމައިފިއެވެ.

ފިނޭންސް މިނިސްޓްރީން ވަނީ މިދިޔަ ހަފުތާ ތެރޭގައި އެކަން ސަރުކާރުގެ އިދާރާތަކަށް ސިޓީއަކުން އަންގައިފައެވެ. އެ ސިޓީގައި ވާގޮތުން އަންނަ ޖެނުއަރީން ފެށިގެން އަމަލުކުރަން ފަށާ އެ އުސޫލުގެ ދަށުން، ރިޓަޔާ ކުރާ މީހުންނަށް ކޮންމެ މަހަކު ލިބޭ އެލަވަންސް ދެން ނުލިބޭނެއެވެ. ނަމަވެސް ރިޓަޔާ ކުރާ މުވައްޒަފުންނަށް ގަނޑުކޮށް ދޭ ފައިސާ ދެމުންދާނެ ކަމަށް އެ ސިޓީގައި ވަނީ ބަޔާންކޮށްފައެވެ.

އަލަށް ރިޓަޔާކުރާ މުވައްޒަފުންނަށް އިނާޔަތް ދިނުުން ހުއްޓާލި ނަމަވެސް މި އަހަރުގެ ނިޔަލަށްް ވަޒީފާ އިން ރިޓާޔާވެ މަހުން މަހަށް އެލަވަންސް ލިބޭ މުވައްޒަފުންގެ އެލަވަންސަށް އެއްވެސް ބަދަލެއް ނާންނާނެ ކަމަށްވެސް އެ ސިޓީގައި ބަޔާންކޮށްފައިވެއެވެ.

އަލަށް ރިޓަޔާކުރާ މުވައްޒަފުންނަށް އިނާޔަތް ދިނުުން ހުއްޓާލަން ނިންމާފައިވާއިރު، އުމުރުން 65 އަހަރުން މަތީގެ މީހުންނަށް ކޮންމެ މަހަކު ދައުލަތުން ދޭ 5،000ރ ގެ އަސާސީ ޕެންޝަން ތަނަވަސް މީހުންނަށް ނުލިބޭ ގޮތަށް އަންނަ އަހަރުގެ ބަޖެޓުގައި ވަނީ ހިމަނާފައެވެ.

މިކަމާ ގުޅިގެން ފިނޭންސް މިނިސްޓްރީން ބުނީ މި ފިޔަވަޅުތައް އަޅަނީ ސަރުކާރުން ހަރަދު ކުޑަކުރުމަށް ކުރާ މަސައްކަތްތަކުގެ ތެރެއިން ކަމަށެވެ. މީގެއިތުރުން ފިނޭންސް މިނިސްޓްރީ އިން ބުނީ ޖީޑީޕީގެ ނިސްބަތުން ޕެންޝަނަށް ކުރާ ހަރަދު މިހާރު 1 ޕަސެންޓަށް ވުރެ ކުޑަކޮށް ހުރި ނަމަވެސް ކުރިއަށް އޮތް 10 އަހަރު ތެރޭގައި އެއަށް ވުރެ އިތުރުވާނެ ކަމަށެވެ.