ކުށުގެ ޝިކާރައަކަށްވާ ކުދިންގެ އަދި ކުށުގެ ތުހުމަތުވާ ކުދިންގެ މައުލޫމާތު އާންމު ނުކުރަން ޖެންޑާ މިނިސްޓްރީއިން އެދިއްޖެއެވެ.
ސީދާ ގޮތުން ނުވަތަ ނުސީދާގޮތުން އަނިޔާގެ ޝިކާރައަކަށްވާ ކުދިންގެ ޒާތީ މައުލޫމަތު ދެނެގަނެވޭނެފަދަ މައުލޫމާތުތަކާއި މައްސަލަތަކާއި ގުޅުވާ ކުޑަކުދިންގެ ފޮޓޯ އާންމެ ކުރަމުންދާތީ އެފަދަ މައުލޫމާތު އާންމު ނުކުރުމަށް ޖެންޑާ އެދި ޖެންޑާ މިނިސްޓްރީއިން ވަނީ ބަޔާނެއް ނެރެފައެވެ.
ޖެންޑާ މިނިސްޓްރީއިން ބުނީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގެ 33 ވަނަ މާއްދާގައި ކުޑަކުދިންގެ ކަރާމާތަށް އުނިކަން އަންނަ ގޮތަކަށް ކުޑަކުދިންގެ ޒާތީ މައުލޫމާތު އެއްވެސް ފަރާތަކުން އާންމުކޮށްގެން ނުވާނެ ކަމަށެވެ.
އެގޮތުން ކުށުގެ ތުހުމަތުގައިވާ ކުދިންނާއި ކުށުގެ ޝިކާރައަކަށްވެފައިވާ ކުދިންނާއި އެހެން ވެސް ސަބަބަކަށްޓަކައި އަޅާލުމާއި ރައްކާތެރިކަން ބޭނުންވާ ކުދިންގެ ނަން، އެޑްރެސް، ތައުލީމު ހާސިލުކުރާ ތަނުގެ މައުލޫމާތު ފަދަ ޒާތީ މައުލޫމާތު ނުވަތަ އެކުދިންގެ ތަސްވީރު، ނުވަތަ ސީދާ ގޮތުން ނުވަތަ ނުސީދާ ގޮތުން ނަމަވެސް ކުއްޖާއަކީ ކާކުކަން ދެނެގަނެވޭނޭ ފަދަ އެއްވެސް މައުލޫމާތެއް މީޑީއާގައި ނުވަތަ އެނޫން ވެސް ވަސީލަތެއްގައި ޝާއިއުކޮށްގެން ނުވާނެކަން ބަޔާންކޮށްފައިވާކަން ޖެންޑާ މިނިސްޓްރީއިން ވަނީ ފާހަގަކޮށްފައެވެ.
ސޯޝަލް މީޑިއާގައި ދައުރުކުރާ ބައެއް ފޮޓޯތަކާއި ވީޑިއޯތަކުގެ ސަބަބުން، ސީދާ ގޮތުން ނުވަތަ ނުސީދާ ގޮތުން ނަމަވެސް އެ ކުދިންނަކީ ކޮންބައެއްކަން އާންމުންގެ ތެރެެއިން ބަޔަކަށް އެނގި އެ ކުދިންނަށް ނަފްސާނީ ގޮތުން އިތުރު ގެއްލުންތައް ލިބި ކުދިންގެ ކަރާމާތައް އުނިކަން ލިބިގެންދިއުމަކީ ޖެންޑާ މިނިސްޓްރީއިން ނުހަނު ކަންބޮޑުވާ ކަމެއް ކަމުގައި އެ މިނިސްޓްރީއިން ވަނީ ބުނެފައެވެ.
އެހެންކަމުން ކުދިންގެ ކަރާމާތަށް އުނިކަމެއް ލިބިދާނެ އެއްވެސް ކަމެއް ވިޔަ ނުދިނުމަށްޓަކައި އެފަދަ ފޮޓޯތަކެއް ދައުރު ނުކުރުމަށް ޖެންޑާ މިނިސްޓްރީއިން ވަނީ އިލްތިމާސްކޮށްފައެވެ.
މީގެއިތުރުން ކުއްޖަކަށް އެއްވެސް ބާވަތެއްގެ އަނިޔާއެއް ލިބޭކަން އެނގޭނަމަ ލަސްނުކޮށް ޖެންޑާ މިނިސްޓްރީގެ ޗައިލްޑް ހެލްޕްލައިން 1412 އަށް ގުޅާ ރިޕޯޓް ކުރުމަށް ވެސް އެ މިނިސްޓްރީއިން އެދިފައިވެއެވެ.
