މަކަރާއި ހީލަތުން ފައިސާ ހޯދަމުން ދިޔަ މައްސަލައިގައި ފުލުހަކު ބައިވެރިވާކަމަށް ދެކެވޭ ވާހަކަ ދޮގުކޮށް، މައްސަލައިގެ ތަހުގީގު އެއްވެސް ހިސާބަކުން މި މައްސަލައިގައި ފުލުހަކު ބައިވެރިވާކަން ފާހަގަކުރެވިއްޖެ ނަމަ އެ ފުލުހަކާ މެދު ފިޔަވަޅު އަޅާނެކަމަށް ދިވެހި ފުލުހުންގެ ހިދުމަތުން ބުނެފިއެވެ.
ފުވައްމުލައް ސިޓީގެ އަންހެނެއްގެ ފޭސްބުކް އެކައުންޓް ހެކްކޮށްގެން، މަކަރާއި ހީލަތުން ފައިސާ ހޯދަމުން މި މައްސަލައިގައި ފުލުހަކާ، އޭނާގެ އަނބިމީހާ ބައިވެރިވާކަމަށް ބުނެ ސޯޝަލް މީޑިއާގައި ފަތުރަމުންދާ ހަބަރާއި ގުޅިގެން ފުލުސް މީހާ ޕޯސްޓެއްގައި ބުނީ އޭނާ އާއި އޭނާގެ އަންހެނުންގެ އަބުރު ގެއްލޭ ގޮތަށް ދޮގުވާހަކަތައް ފޭސްބުކު އަދި ޓުވިޓާގައި ނުފެތުރުން އަންނަކަމަށެވެ.
މި މައްސަލައާއި ގުޅިގެން ފުލުހުން ނެރުނު ބަޔާނެއްގައި ބުނީ މި މައްސަލައާއި ގުޅުން ހުރި އިތުރު 3 މައްސަލައެއް ބަލަމުން އަންނަކަަމަށެވެ. މި މައްސަލަ ހުށަހެޅުމާއެކު ތަހުގީގުގެ ތެރެއިން އަޅަންޖެހޭ ފިޔަވަޅުތައް އަޅާފައިވާކަން ފާހަގަކޮށް ފުލުހުން ބުނީ ވައިބާ އެކައުންޓް ރިކަވާ ކުރެވި ވެރިފަރާތުގެ ބާރުގެ ދަށަށް ގެނެވިފައިވާކަމަށެވެ. އަދި ތަފާތު 3 މީހެއްގެ އަތުން އޮޅުވާލައިގެން ހޯދި 10،100 ރުފިޔާ، އީމެއިލް އަދި ބޭންކް އެކައުންޓް ކޮމްޕްރޮމައިޒް ވެފައިވާ އެކައުންޓަށް ޖަމާކޮށްފައިވާކަމަށެވެ. އަދި މި ފައިސާގެ ތެރެއިން 5600 ރުފިޔާ ފައިސާ ދައުރުވެފައިވާ އެކައުންޓްތަކުގެ ތެރެއިން އެކައުންޓެއްގައި ހޯލްޑު ކުރެވިފައިވާކަމަށް ފުލުހުން ވަނީ ބުނެފައެވެ.
ފުލުހުން އިތުރަށް ބުނީ މި މައްސަލައިގެ ތަހުގީގަށް އަދި މިހާތަނަށް ފުލުހެއްގެ އެއްވެސް ބައިވެރިވުމެއް ފާހަގަކުރެވިފައި ނުވާކަމަށެވެ. އަދި މި މައްސަލައިގައި އޮޅުވާލައިގެން ފައިސާ ދައުރުކުރުމުގައި ބޭނުންކުރި އެއް އެކައުންޓަކީ ފުލުހެއްގެ އަނބިމީހާގެ އެކައުންޓުކަމުގައި ވީ ނަމަވެސް އެ އެކައުންޓަކީ އެ އަންހެން މީހާގެ އީމެއިލާއި ބޭންކު އެކައުންޓް ކޮމްޕްރޮމައިޒްކޮށްގެން އެހެންބައެއްގެ ބާރުގެ ދަށަށް ގެނެސްފައިވާ އެކައުންޓެއްކަމުގައި ފުލުހުން ވަނީ ބުނެފައެވެ.
މި މައްސަލަ ފުލުހުންގެ އިކޮނޮމިކް ކްރައިމް އިން ދަނީ ތަހުގީގުކުރަމުންނެވެ. ފުލުހުން ބުނީ މި މައްސަލައިގައި މަކަރާއި ހީލަތުން ހޯދާފައިވާ ފައިސާގެ ތެރެއިން ރިކަވާ ނުކުރެވިފައިވާ ފައިސާ ރިކަވާ ކުރުމުގެ މަސައްކަތް ކުރަމުން ދާކަމަށެވެ.
