މާލޭގެ ގެއަކުން އަގު ބޮޑު ފޯނުތަކެއް ވަގަށް ނަގައިގެން ފުލުހުންނަށް ފިލަން ގޭގެ އަލަމާރި ތެރެއަށް ވަދެ އޮއްވައި ހައްޔަރުކޮށްފިއެވެ.
މި މައްސަލާގައި ހައްޔަރުކޮށްފައިވަނީ ހދ. ކުޅުދުއްފުށީ، ސީސަންވިލާ، އާދަމް މުހައްމަދު(33އ)އެވެ. އޭނާ ފިލަންވެގެން އަލަމާރި ތެރެއަށް ވަދެ އޮތީ ބޮލުގައި ކޮތަޅެއް އަޅައިގެންނެވެ.
ކްރިމިނަލް ކޯޓުން ނެރުނު އަމުރުގައި ބުނީ އޭނާ ގެއަކަށް ވަދެ ވައްކަން ކުރީ ދަންވަރު ކަމަށެވެ. އަދި އޭނާ އެ ގެއަށް ވައްކަން ކުރަން ވަންނަ މަންޒަރާއި، ގޭތެރޭގައި ހަރަކާތްތެރިވާ މަންޒަރު ސީސީޓީވީ ސްނެޕްޝޮޓްތަކުން ފެންނަ ކަމަށް ކޯޓު އަމުރުގައި ވަނީ ބުނެފައެވެ. މީގެ އިތުރުން އެ އަމުރުގައިވަނީ އޭނާ އެގޭތެރެއިން އަގުބޮޑު ދެ ފޯނު ވަގަށް ނެގި ކަމަށް ވެސް ބުނެފައެވެ.
އިތުރަށް ކޯޓު އަމުރުގައި ބުނީ ފުލުހުން އޭނާ ހައްޔަރުކުރަން ދިއުމުން، އޭނާ ދިރިއުޅޭ ގޭގެ އަލަމާރިތެރެއަށް ވަދެ ބޮލުގައި ކަޅު ކޮތަޅެއް އަޅުވައިގެން ފުލުހުންނަށް ފިލަން މަސައްކަތް ކޮށްފައިވާ ކަމަށެވެ.
އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ދިފާއުގައި އެއްވެސް ވާހަކައެއް ދައްކާފައި ނުވާއިރު ކޯޓުން ވަނީ އޭނާގެ ބަންދަށް 15 ދުވަސް ޖަހާފައެވެ.
