އާބަން ރީޖަންތައް ކަނޑައަޅައި، އެ ސަރަހައްދުތައް ތަރައްގީކުރުމުގެ ބާރު އާބަން އޮތޯރިޓީއަށް ދޭ ބިލު މަޖިލީހުން މިއަދު ފާސްކޮށްފިއެވެ.
މި ބިލު ފާސްކުރުމާ މެދު ގޮތެއް ނިންމުމަށް ރިޔާސަތުން ވޯޓަށް އެހުމުން، ވޯޓުގައި ބައިވެރިވި 81 މެންބަރުންގެ ތެރެއިން 70 މެންބަރުން ބިލު ފާސްކުރަން ވޯޓުދެއްވިއިރު، ފާސްކުރަން ނުފެންނަ ކަމަށް 11 މެންބަރަކު ވޯޓު ދެއްވިއެވެ.
ސަރުކާރުގެ ފަރާތުން ހުށަހެޅި މި ބިލުގައިވާ ގޮތުން ތިން ބަޔަކަށް ރާއްޖޭގެ ސަރަހައްދުތައް ބަހާލާނެ އެވެ. އެއީ މެޓްރޮޕޮލިޓަން ސަރަހައްދާ، އާބަން ރީޖަން އާއި އާބަން ސެންޓަރުތަކެވެ. އަދި އެ ސަރަހައްދުތައް ބައި ކުރަނީ އާބާދީގެ ނިސްބަތަށް ބަލައިގެންނެވެ.
މި ބިލުގައިވާ ގޮތުން، މެޓްރޮޕޮލިޓަން ސަރަހައްދެއްގެ ގޮތުގައި ކަނޑައަޅަނީ އެ ސަރަހައްދެއްގެ އާބާދީ 150،000 މީހުންނަށް ވުރެ އިތުރުވުމުންނެވެ. އާބަން ރީޖަނެއް ކަމަށް ކަނޑައަޅާނީ ބައިލައްކަ މީހުންނަށް ވުރެ ބޮޑު އާބާދީއެއް އޮންނަ ސަރަހައްދުތަކެވެ. އަދި އާބަން ސެންޓަރުތައް ކަމަށް ކަނޑައަޅާނީ އާބާދީ 10،000 މީހުންނަށް ވުރެ އިތުރު ސަރަހައްދުތަކެވެ.
މީގެ އިތުރުން، އާބަން ސަރަހައްދެއްގެ ގޮތުގައި ކަނޑައަޅާނީ ކައުންސިލެއްގެ އިހުތިސާސް ތެރޭގައި ހިމެނޭ ސަރަހައްދެއް ކަމަށް ވިޔަސް އެ ސަރަހައްދެއް ޕްލޭން ކުރުމާއި ތަރައްގީ ކުރުމުގެ ހުރިހާ ކަމެއް ނިންމާނީ އާބަން ޑިވެލޮޕްމަންޓް އޮތޯރިޓީން ކަމަށާއި، ކައުންސިލްތަކުން ހަމައެކަނި ބަލަހައްޓާނީ އެ ސަރަހައްދެއްގެ މުނިސިޕަލް ހިދުމަތްތައް ކަން، އެ ބިލުގައި ވެއެވެ.
އިތުރަށް އެ ބިލުގައިވާ ގޮތުން އެފަދަ ސަރަހައްދުތައް ޕްލޭން ކުރުމާ، ތަރައްގީ ކުރުމުގެ ކަންކަން އޮތޯރިޓީގެ ބެލުމުގެ ދަށަށް ގެންނާނީ އެ ސަރަހައްދެއްގެ ކައުންސިލާ އެކު ހަދާ އެއްބަސްވުމެއްގެ ދަށުންނެވެ. އަދި މިހާރު މީހުން ދިރިނޫޅޭ ސަރަހައްދެއް ނަމަ އެ ސަރަހައްދެއް ޕްލޭންކޮށް ތަރައްގީ ކުރުމުގެ ހުރިހާ ބާރެއް ލިބޭނީ އާބަން ޑިވަލޮޕްމެންޓް އޮތޯރިޓީއަށެވެ.
ބިލުގައި ބަޔާން ކޮށްފައިވާ ގޮތުން ސަރަަހައްދުތައް ޕްލޭން ކުރުމަށްޓަކައި އާބަން ޑިވެލޮޕްމަންޓް މާސްޓަ ޕްލޭން އެކުލަވައިލަން ޖެހެއެވެ.
މި ބިލާ ގުޅޭގޮތުން އިދިކޮޅު އެމްޑީޕީންނާއި ޑިމޮކްރެޓުން ކަންބޮޑުވުން ފާޅުކޮށް، ބިލު ފާސްވެއްޖެ ނަމަ ކައުންސިލްތަކުގެ ބާރު ގެއްލޭނެ ކަމަށް ދެ ޕާޓީން އޭރު ބުނެފައިވެއެވެ.
