އަންނަ މަހުގެ 15 ވަނަ ދުވަހުގެ ނިޔަލަށް، ރައްޔިތުންގެ މަޖިލީހުގެ މި ހިނގާ ދައުރު ދަންމާލައިފިއެވެ.
މިއަދުގެ ޖަލްސާ ފެށްޓެވުމުގެ ކުރިން މަޖިލީހުގެ ރައީސް އަބްދުއްރަހީމް އަބްދުﷲ ވަނީ، މަޖިލީހުގައި ނިންމަން ޖެހޭ މުހިންމު މަސައްކަތްތަކެއް ހުރުމާ އެކު، މި ދައުރު އަންނަ މަހުގެ 15 ވަނަ ދުވަހުގެ ނިޔަލަށް ދަންމާލަން ގަސްދުކުރައްވާ ކަމަށް ވިދާޅުވެފައެވެ.
ރައްޔިތުންގެ މަޖިލީހުގެ ގަވާއިދުގައިވާ ގޮތުން މި ދައުރުގެ ފަހު ދުވަހަކީ ނޮވެމްބަރު 30 ވަނަ ދުވަހެވެ.
އެހެންކަމުން މަޖިލީހުގެ ދައުރު ދަންމާލަން ފެނޭތޯ އަބްދުއްރަހީމް ވޯޓަށް އެއްސެވުމުން، ވޯޓުގައި ބައިވެރިވި 79 މެންބަރުންގެ ތެރެއިން ދައުރު ދަންމާލަން ފެންނަ ކަމަށް 68 މެންބަރަކު ވޯޓު ދެއްވިއިރު، ނުފެންނަ ކަމަށް 11 މެންބަރަކު ވޯޓު ދެއްވިއެވެ.
މަޖިލީހުގެ ގަވައިދުގައިވާ ގޮތުން، ކޮންމެ އަހަރަކު ވެސް މަޖިލީހުގައި ތިން ދައުރެއް އޮވެއެވެ. އެއީ:
- ފުރަތަމަ ދައުރު: ފެބްރުއަރީން މޭ 15 އަށް
- ދެވަނަ ދައުރު: ޖޫން މަހުން އޮގަސްޓް 15 އަށް
- ތިންވަނަ ދައުރު: އޮކްޓޯބަރުން ނޮވެމްބަރަށް
