ގަވާއިދާ ހިލާފަށް ރާއްޖެ އައި ސްރީލަންކާގެ މަސްބޯޓަކުން 400 ކިލޯއަށް ވުރެ ގިނަ މަސްތުވާތަކެތި އަތުލައިގެން މައްސަލައިގައި ހައްޔަރުކުރި 5 މީހުން ކަސްޓޯޑިއަލް ޖަލެއްގައި 30 ދުވަހަށް ބަންދުކުރުމަށް ކުޅުދޫފުށި މެޖިސްޓްރޭޓް ކޯޓުން އަމުރުކޮށްފިއެވެ.
މި މައްސަލައިގައި ހައްުޔަރު ކޮށްފައިވާ ލަންކާގެ 5 މީހުންނަކީ:
- ރާޖްޕަކްޝަ ގެމަގޭ ދެނޫޝަ މަޑުމަލް (21އ)
- މުއްތިމާ ޕަޓަބިންދިގޭ އަމިޝްކަ ސަންޖީވަ ކުމާރަ (22އ)
- ޗަމޮދް ދިވަންގާ ދިލަކާވަ (22އ)
- ލޮރެންސު ހޭވާގީ ސަރަތު (56އ)
- ވިޖޭވީރަ ގުނަރަތުނާ މަހާވިދޯމާ (37އ)
މި މީހުން ހައްޔަރުކޮށްފައިވަނީ ގަވާއިދާ ހިލާފަށް ރާއްޖެ އައިސް އުޅެނިކޮށް ހދ. މަކުނުދޫ ބޭރުން ނޮވެމްބަރު 24 ވަނަ ދުވަހުގެ ދަންވަރު ވަގުތެއްގައެވެ. ކޮމިޝަނާ އޮފް ޕޮލިސް އަލީ ޝުޖާއު ވިދާޅުވީ ބޯޓުން 468.6 ކިލޯގެ މަސްތުވާތަކެތި ފެނިފައިވާ ކަމަށާއި، އެއީ 344 ކިލޯގެ މެތު، 124.6 ކިލޯގެ ކޮކެއިން ކަމަށެވެ.
މީގެއިތުރުން އެ ތަކެތީގެ މަގުމަތީގެ އަގު 1 ބިލިއަން ރުފިޔާއަށް އަރާކަމަށްވެސް ޝުޖާއު ވަނީ ވިދާޅުވެފައެވެ. "އަށެކުންތަ" ނަމަކަށް ކިޔުނު މި މަސްބޯޓު ފެނުމާއެކު އެ ބޯޓު ވަނީ ކޯސްޓުގާޑުގެ ބެލުމުގެ ދަށަށް ގެންގޮސް ހދ. ކުޅުދުއްފުއްޓަށް ގެންގޮސްފައެވެ.
މި މައްސަލަ އިތުރަށް ތަހުގީގު ކުރަމުންދާކަމަށް ފުލުހުން ވަނީ ބުނެފައެވެ.
