ޕީއެންސީގެ އެތެރޭގެ އިންތިހާބުގެ ވަގުތީ ނަތީޖާ އާންމުކޮށް، ޝަކުވާ ހުށަހެޅުމުގެ ފުރުސަތު ހުޅުވާލައިފިއެވެ.
ޕީއެންސީގެ އެތެރޭގެ އިންތިހާބު ބާއްވާފައި ވަނީ މިދިޔަ ހޮނިހިރު ދުވަހު ހެނދުނު 10:00 އިން މެންދުރުފަހު 2:00 އަށެވެ.
ޕީއެންސީއިން ބުނީ އެ ޕާޓީގެ އެތެރޭގެ އިންތިހާބުގެ ވަގުތީ ނަތީޖާ އިއުލާނުކޮށްފައި ވަނީ ވޯޓުލާ މަރުކަޒުތަކުގައި ވޯޓު ގުނައި، އެ މަރުކަޒުތަކުގައި އިއުލާނުކުރި ގޮތަށް ކަމަށެވެ. އަދި ނަތީޖާއާ މެދު އެއްވެސް ޝަކުވާއެއްވާނަމަ، ހެކިތަކާއެކު ޝަކުވާ ފޯމް ހުށަހެޅުމަށް ޕީއެންސީއިން ވަނީ އެދިފައެވެ.
ވަގުތީ ނަތީޖާއަށްފަހު، މުޅި ރާއްޖޭގައި ބެހެއްޓި 143 ވޯޓު ފޮށީގެ ވޯޓު ކަރުދާސްތަކާއި ނަތީޖާ ޝީޓުތަކުގެ އަސްލު ޕާޓީގެ ރަސްމީ އޮފީހަށް ލިބުމުން ހުށަހެޅިފައިވާ ޝަކުވާތަކަށް ރިއާޔަތްކުރުމަށްފަހު ދާއިމީ ނަތީޖާ އިއުލާނު ކުރާނެ ކަމަށް ވެސް އެ ޕާޓީއިން ވަނީ ބުނެފައެވެ.
ޕީއެންސީއިން ބުނީ އިންތިހާބުގެ ވޯޓުލުން ކުރިއަށް ދިޔަ މަގާމުތަކާއި ވޯޓަކާއި ނުލައި އިންތިހާބުވެގެންދިޔަ މެންބަރުންގެ މައްޗަށް އެކުލެވިގެންވާ ސްޓިއަރިން ކޮމިޓީގެ މެންބަރުންގެ ހާމަ ވޯޓަކުން 72 ގަޑިއިރުގެ ތެރޭގައި ކަނޑައަޅަންޖެހޭ އިތުރު މަގާމުތައް ކަނޑައެޅުމުގެ އިޖުރާއާތު ކުރިއަށް ގެންދާނީ ދާއިމީ ނަތީޖާއަށްފަހު ކަމަށެވެ. އަދި އެކަން ކުރިއަށް ގެންދާނީ ޕާޓީއިން ކަނޑައަޅާ އިންތިޒާމެއްގެ ތެރެއިން ޕާޓީއިން އަންގާ ގޮތެއްގެ މަތިން ކަމަށެވެ.
ޕީއެންސީގެ އެތެރޭގެ އިންތިހާބުގައި ޖުމްލަ 143 ވޯޓު ފޮށި ބަހައްޓާފައިވެއެވެ. އޭގެތެރެއިން 53 ވޯޓު ފޮށި ބަހައްޓާފައި ވަނީ މާލޭގައެވެ. 667 ކެންޑިޑޭޓުން ވާދަކުރާ މި އިންތިހާބުގައި ވޯޓުލުމުގެ ހައްގު ޖުމްލަ 34،904 މީހުންނަށް ލިބިފައިވެއެވެ.
