ދެ ދުވަހުގެ މުއްދަތަށް ކުރިއަށްދާ ނުވަ ވަނަ އިސްލާމިކް ފައިނޭންސް ފޯރަމް އޮފް ސައުތު އޭޝިއާ (އައިއެފްއެސްއޭ) ކޮލަމްބޯގެ ޝަންގްރިއްލާ ސިނަމަން ގްރޭންޑްގައި ފަށައިފިއެވެ.
ކޮންމެ އަހަރަކު ބާއްވާ މި ހަރަކާތެއްގައި އޭޝިއާ ސަރަހައްދުގެ ހުރިހާ ގައުމުތަކުން ބައިވެރިވާއިރު މިފަހަރުގެ ފޯރަމްގައި މަންދޫބުންގެ ގޮތުގައި ރާއްޖޭގެ އިތުރުން، އިންޑިއާ، ޕާކިސްތާން، މެލޭޝިއާ، ބަންގްލަދޭޝް އަދި ދެކުނު އެފްރިކާއިން ވަނީ ބައިވެރިވެފައެވެ.
އިއްޔެ، ކޮލަމްބޯގެ ޝަންގްރިއްލާގައި ފެށި މި ފޯރަމްގެ ޝަރަފުވެރިކޮށްދެއްވީ ކުރީގެ ފިނޭންސް މިނިސްޓަރު ޑރ. މުހައްމަދު ޝަފީގުއެވެ. ކޮންފަރެންސްގެ ޗެއާމަންކަން ކުރައްވަނީ މެލޭޝިއާގެ އިންސީއީއެފްގެ ޕްރޮފެސަރު ޑރ. އައިޝަތު މުނީޒާއެވެ. މި ފޯރަމްގައި ކީނޯޓު ހިތާބު ދެއްވާނީ އައިބީއެފްގެ ދާއިރާއިން ދެކުނު އޭޝިއާގެ އެންމެ ކުރިއަރާފައިވާ މާކެޓް ކަމަށްވާ ޕާކިސްތާނުގެ މަޝްހޫރު ޕްރެކްޓިޝަނާ ޑރ.އިރަމް ސަބާއެވެ.
މި އިވެންޓުގައި ސްޕީކަރުންނާއި ޕެނަލިސްޓުންގެ ފަރާތުން އިސްލާމިކް ބޭންކިންގެ ފަންނީ ކަންކަމަށް ސަމާލުކަން ދިނުމުގެ އިތުރުން އާޓިފިޝަލް އިންޓެލިޖެންސް ފަދަ ޒަމާނީ މައުޟޫއުތަކަށް މަޝްވަރާކޮށް ވާހަކަދެއްކުމަށް ވަނީ ހަމަޖެހިފައެވެ. މި ފޯރަމްގެ ސްޕީކަރުންގެ ތެރޭގައި ބޭންކުތަކުގެ ސީއީއޯ، އެތައް ގައުމެއްގެ ބައިނަލްއަގްވާމީ އިލްމުވެރިން، އެންބީއެފްއައިތަކާއި، އިންޝުއަރެންސް ކުންފުނިތަކާއި، ޓެކްނޮލޮޖީ ފަރުމާތަކާއި، އޮޑިޓް އަދި އެޑްވައިޒަރީ ފަރުމާތަކާއި އެޓް އަލްގެ 'ސީ' ލެވެލްގެ އެގްޒެކެޓިވުން ބައިވެރިވުމަށް ހަމަޖެހިފައިވެއެވެ.
އިއްޔެ އާއި މިއަދު ބާއްވާ މައި ކޮންފަރެންސް އަށް ފަހު، އިސްލާމިކް ފައިނޭންސް އިން ލިބޭ ފުރުސަތުތަކާ ބެހޭ ގޮތުން، ޑޮމެސްޓިކް މާކެޓަށް އަލިއަޅުވާލައިގެން، އަދުލް ކެޕިޓަލް އިން ބާއްވާ އިވެންޓެއް ކުރިއަށް ގެންދިއުމަށް ވަނީ ހަމަޖެހިފައެވެ. ދެ ދުވަހުގެ މުއްދަތަށް ކުރިއަށްދާ މި ޕްރޮގްރާމް ނިންމާލާނީ ނޮވެމްބަރު މަހުގެ 26 ވަނަ ދުވަހު ސިނަމަން ލޭކްސައިޑްގައި ބާއްވާ އިފްސާ އެވޯޑްސް އިންނެވެ.
