ބޯހިޔާވަހިކަމުގެ މައްސަލަ ހައްލުކޮށް ފަސޭހައިން ގެދޮރު އެޅުމަށް ސަރުކާރުން ތައާރަފްކުރި "ހިޔާވެހި ފައިނޭންސިން ޕްރޮގްރާމް" ގެ ދަށުން ސްކީމަށް ކުރިމަތިލުމުގެ ފުރުސަތު ހަމަވާތާ ތިން މަސް ދުވަހުގެ ތެރޭގައި ލޯނު ދޫކުރުމުގެ މަސައްކަތް ފައްޓަވާނެކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވަޒީރު ޑރ. އަލީ ހައިދަރު އަހްމަދު ވިދާޅުވެއްޖެއެވެ.

ޕީއެސްއެމް ނިއުސް އިން ގެނެސްދޭ "ހަފްތާ 52" ޕްރޮގްރާމްގައި މިނިސްޓަރު ވިދާޅުވީ ރާއްޖޭގައި ބޯހިޔާވަހިކަމެއް ލިބިފައިނުވާ އެންމެނަށް އެކަށީގެންވާ ބޯހިޔާވަހިކަމެއް ހޯދައިދިނުމަކީ ރައީސުލްޖުމްހޫރިއްޔާގެ އެންމެ އިސް އެއް ވައުދުފުޅުކަމަށެވެ.

ހިޔާވެހި ސްކީމުގެ އިވެލުއޭޝަން ފަށާނީ އެޕްލިކޭޝަން ފޯމްތައް ލިބޭ ހިސާބުން ފެށިގެން ކަން ފާހަގަކުރައްވަމުން މިނިސްޓަރު ވިދާޅުވީ މަސައްކަތްކުރަމުން ދަނީ ތިން މަސް ދުވަހުގެ ތެރޭގައި ފުރަތަމަ ބުރުގެ ލޯނުތައް ދޫކުރުމުގެ މަސައްކަތް ފަށުމަށްކަމަށެވެ. އަދި މި މަސައްކަތްކުރަމުން ދަނީ މޯލްޑިވްސް އިސްލާމިކް ބޭންކާއި ބޭންކް އޮފް މޯލްޑިވްސްއާއި ހައުސިން ޑިވެލޮޕްމަންޓް ފައިނޭންސް ކޯޕަރޭޝަން ހިމެނޭގޮތަށްކަމަށް މިނިސްޓަރު ވިދާޅުވިއެވެ. "އެއީ އަޅުގަނޑުމެން މި ސްކީމް ރާވާފައި އޮތް ގޮތަކީ. ލޯނު ސްކީމަކީ މުޅި ރާއްޖެއަށް ހުޅުވާލާފައި އޮތް ފުރުސަތެއް" މިނިސްޓަރު ވިދާޅުވިއެވެ.

https://thepress.mv/157548

"ހިޔާވެހި ފައިނޭންސިން" ސްކީމަށް ކުރިމަތިލުމުގެ ފުރުސަތު މި މަހުގެ 8 ވަނަ ދުވަހުން ފެށިގެން އޭޕްރީލް 28، 2025 ވާ އަންގާރަ ދުވަހުގެ ރޭ 23:59 އާއި ހަމައަށް ވަނީ ހުޅުވާލާފައެވެ. ހިޔާވަހި ސްކީމަށް އެދި ހުށައެޅުމަށް 6 މަސް ދުވަހުގެ މުއްދަތެއް ދީފައިވާއިރު މި ސްކީމްތައް ދޫކުރަނީ އަލަށް ގެދޮރު ބިނާ ކުރުމަށް ފައިސާގެ އެހީ ބޭނުންވާ ފަރާތްތަކަށެވެ. އަދި މި ހުރިހާ ސްކީމަކަށް ވެސް އަނބުރާ ފައިސާ ދެއްކުމުގެ މުއްދަތު އެންމެ ގިނަވެގެން 25 އަހަރަށް ބަހާލައިގެން ދެއްކޭނެއެވެ.

ބޯހިޔާވަހިކަން ޑރ. އަލީ ހައިދަރު އަހްމަދު