ގދ. ތިނަދޫ ގައި 10،000 މީހުން ހަމަނުވާތީ އެ ރަށަށް ދިން ސިޓީއެއްގެ ދަރަޖަ އުނިކުރުމަށް އެދި، ހައިކޯޓަށް ދުސްތޫރީ މައްސަލައެއް ހުށަހެޅި ޑެޕިއުޓީ މިނިސްޓަރު ވަޒީފާއިން ވަކިކޮށްފިއެވެ.
މިދިޔަ ބުރާސްފަތި ދުވަހު މި މައްސަލަ ހައި ކޯޓަށް ހުށަހަޅާފައި ވަނީ އެންވަޔަރަމަންޓް މިނިސްޓްރީގެ ޑެޕިއުޓީ މިނިސްޓަރު އަދި ގާނޫނީ ވަކީލު އަހުމަދު ރަގީބެވެ.
މިކަން ހާމަކުރައްވާ ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ ރަގީބު މަގާމުން ވަކިކުރަން ނިންމެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަމަށެވެ. އަދި ރައީސް މި ގޮތަށް ނިންމެވީ ތިނަދުއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެން ކަމަށް ހީނާ ވިދާޅުވިއެވެ.
ރާގިބު، ރައީސް އޮފީހަށް ރައްދުވާ ގޮތަށް ހުށަހެޅި މައްސަލައިގައި ވަނީ، ތިނަދޫގެ އާބާދީގައި 10،000 މީހުން ހަމަވާ ކަމަށް ދައްކާފައި ވަނީ ސައްހަ ނޫން މައުލޫމާތު ތަކެއް ހިމެނޭ އާބާދީގެ ލިސްޓަކުން ކަމަށެވެ. އަދި އެއާއެކު، އެ ރަށުގެ އާބާދީގައި ސިޓީއެއްގެ ދަރަޖަ ދޭ މިންވަރަށް މީހުން ހަމަނުވާ ކަމަށް ބުނެ، ސަބަބުތަކެއް ވަނީ ހިއްސާކޮށްފައެވެ.
ކޯޓަށް ހުށަހެޅި ދުސްތޫރީ މައްސަލާގައި އެދިފައިވަނީ ތިނަދުއަކީ ސިޓީއެއްގެ ގޮތުގައި ކަނޑައެޅި ނިންމުމާއި އަދި އެ ނިންމުމާ ގުޅިގެން އަޅާފައިވާ އެންމެހާ އިދާރީ ފިޔަވަޅުތައް ބާތިލް ކުރުމަށެވެ. މި މައްސަލަ ބަލައިގަތުމާ މެދު ހައި ކޯޓުން އަދި ވަކި ގޮތެއް ނިންމާފައެއް ނުވެއެވެ.
