ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ގދ. ތިނަދުއަށް ސިޓީގެ ލަގަބު ދިނުމަށް ނިންމެވި އިރު އެ ރަށުގައި 10،000 މީހުން ހަަމަނުވާ ކަމަށް ބުނެ އެ ރަށަށް ދިން ސިޓީއެއްގެ ދަރަޖަ އުނިކުރުމަށް އެދި، ހައިކޯޓަށް ދުސްތޫރީ މައްސަލައެއް ހުށަހަޅައިފިއެވެ.
މިދިޔަ ބުރާސްފަތި ދުވަހު މި މައްސަލަ ހައި ކޯޓަށް ހުށަހަޅާފައި ވަނީ އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު އަދި ގާނޫނީ ވަކީލު އަހުމަދު ރަގީބެވެ.
ރައީސް އޮފީހަށް ރައްދުވާ ގޮތަށް ހުށަހެޅި މި މައްސަލައިގައި ވަނީ، ތިނަދޫގެ އާބާދީގައި 10،000 މީހުން ހަމަވާ ކަމަށް ދައްކާފައި ވަނީ ސައްހަ ނޫން މައުލޫމާތު ތަކެއް ހިމެނޭ އާބާދީގެ ލިސްޓަކުން ކަމަށެވެ. އަދި އެއާއެކު، އެ ރަށުގެ އާބާދީގައި ސިޓީއެއްގެ ދަރަޖަ ދޭ މިންވަރަށް މީހުން ހަމަނުވާ ކަމަށް ބުނެ، ސަބަބުތަކެއް ވަނީ ހިއްސާކޮށްފައެވެ.
އެގޮތުން ފާހަގަ ކޮށްފައިވާ ކަންތައްތަކުގެ ތެރޭގައި:
- ތިނަދޫގެ އާބާދީއަށް 10،000 މީހުން ހަމަކުރުމަށްޓަކައި ކައުންސިލްގެ ދަފްތަރުގައި މަރުވެފައިވާ 115 މީހަކު ހިމަނާފައިވާ ކަމަށް ބުނެފައިވޭ
- ކައުންސިލްގެ ލިސްޓުގައި ތަކުރާރުވާ އައިޑީ ކާޑުތައް ގިނަ ކަމަށް ބުނެފައިވޭ
- ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރު)ގެ ރަޖިސްޓްރީ ލިސްޓާއި ކައުންސިލްގެ ލިސްޓު އަޅައިކިޔުމުން ގާނޫނީ ގިނަ މައްސަލަތަކެއް ފާހަގަވޭ
- މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން ޑީއެންއާރުން ހޯދި ލިސްޓުން ފެންނަނީ މި މަހުގެ 17ގެ ނިޔަލަށް ވެސް ތިނަދޫގެ އާބާދީއަކީ 7،924 ކަމަށް
ކޯޓަށް ހުށަހެޅި ދުސްތޫރީ މައްސަލާގައި އެދިފައިވަނީ ތިނަދުއަކީ ސިޓީއެއްގެ ގޮތުގައި ކަނޑައެޅި ނިންމުމާއި އަދި އެ ނިންމުމާ ގުޅިގެން އަޅާފައިވާ އެންމެހާ އިދާރީ ފިޔަވަޅުތައް ބާތިލް ކުރުމަށެވެ. މި މައްސަލަ ބަލައިގަތުމާ މެދު ހައި ކޯޓުން އަދި ވަކި ގޮތެއް ނިންމާފައެއް ނުވެއެވެ.
