އެންޓި-ކޮރަޕްޝަން ކޮމިޝަން (އޭސީސީ)ގެ ނައިބު ރައީސް އަބްދުއްސަލާމާއި މެންބަރު ތޯހާ މުހައްމަދު ވަކިކުރަން ތާވަލުކޮށްފައި ވަނިކޮށް، މަގާމުން އިސްތިއުފާދެއްވައިފިއެވެ.
'ދަ ޕްރެސް' އިން ސުވާލުކުރުމުން އަބްދުއްސަލާމް ވިދާޅުވީ، އިސްތިއުފާގެ ސިޓީ ރައީސުލްޖުމްހޫރިއްޔާގެ އޮފީހަށް ލިޔުމުންނާއި އީމެއިލް މެދުވެރިކޮޮށް ހުށަހަޅުއްވާފައި ވާނެ ކަމަށެވެ.
ދެ ބޭފުޅުން ވަކި ކުރަން ހުށަހަޅަނީ، މިނިވަން މުއައްސަސާތަކާ ބެހޭ ކޮމިޓީގެ މުގައްރިރު އަދި މާފުށި ދާއިރާގެ މެންބަރު ހުސައިން ރިޒާގެ ސިޓީގައިވާ ގޮތުން، އަމިއްލަ މަގްސަދު ހާސިލްކުރުމަށް ދެ ބޭފުޅުން މަސައްކަތްކުރެއްވި ކަމުގެ ތުހުމަތުގައެވެ. އެ މައްސަލަ ދިރާސާކޮށް ކޮމިޓީން އިއްޔެ ނިންމީ ދެ ބޭފުޅުން ވަކިކުރަން ފެންނަ ކަމަށެވެ.
ދެ ބޭފުޅުންގެ މައްޗަށް ކޮމިޓީން ޖުމްލަ ނުވަ ތުހުމަތެއް ކޮށްފައިވެއެވެ.
އަބްދުއްސަލާމަށް ކޮމިޓީން ކުރި ތުހުމަތުތައް:
- ކުރީގެ ބަންޑާރަނައިބެއްގެ މައްޗަށް ތުހުމަތުކުރެވުނު މައްސަލައެއްގައި ދައުވާކުރެވޭ ވަރަށް ހެކި ހުރި ނަމަވެސް ދައުވާ ނުކުރެވޭނެ ކަމަށް ކަނޑައަޅައި މައްސަލަ ފައިލްކުރުމުގައި އިސް ދައުރެއް އަދާކުރުން
- ބިންވެރިޔާގެ މައްސަލަ އިތުރަށް ބެލުމަށް ލަފާދީފައި އޮއްވާ އެ މައްސަލަ އިތުރަށް ތަހްގީގު ކުރިޔަ ނުދީ ހުއްޓުވައި، ޕްރީލިމިނަރީ އިންވެސްޓިގޭޝަން ނިންމައި މިދިޔަ އަހަރުގެ ސެޕްޓެމްބަރު މަހުގެ ހިސާބުގައި މެންބަރުންނަށް ހުށަހަޅާފައިވީ ނަމަވެސް އެ މައްސަލަ ހުއްޓުވާފައި ވަނީ ވަކި ސިޔާސީ ޕާޓީއަކަށް ގެއްލުންތަކެއް ކުރިމަތިވެދާނެ ކަމަށް ފާހަގަކުރެވޭތީ ކަމާއި، ނަމަވެސް ރިޔާސީ އިންތިހާބާއި މަޖިލީހުގެ އިންތިހާބަށް ފަހު އަލުން ތަހްގީގުކުރަން ނިންމާފައިވުން، އަދި މިކަމުގައި އަމިއްލަ މަސްލަހަތު އިސްކޮށްފައިވުން
- މި މައްސަލައިގައި ތުހުމަތުކުރެވޭ ފަރާތްތަކުގެ ފޯނު ހިފަހައްޓައި ބަލައި ފާސްކުރުމަށް އުޅުނު ކޯޓު އަމުރުތައް ހޯދުން ލަސްކޮށް ހެކި ނައްތާލުމަށް މަގުފަހިކުރުން
- އޭސީސީގެ އޮނިގަނޑު އިސްލާހުކޮށް ފޮރެންސިކް ސެކްޝަނެއް ހަދައި އެ ކޮމިޝަންގެ ކުރީގެ ނައިބު ރައީސަކާއި ކުރީގެ އެހެން މެންބަރަކާ ގާތް ގުޅުމެއް އޮންނަ ގާތް ފަރާތެއް ނެގުމުގެ އިތުރުން އާ ޑިޕާޓްމަންޓެއް ހަދައި، ގާތް މުވައްޒަފަކަށް އެ ޑިޕާޓްމަންޓުގެ ހެޑުކަން ދިނުމަށް މަސައްކަތްކުރަމުން ދިއުން
- ބޭނުންވާ މައްސަލަތައް ވަކި ގޮތަކަށް ނިންމަން މެންބަރުންނަށް ބާރު އެޅުން
- މައްސަލަތައް އެޖެންޑާކުރުމުގައި އަމިއްލަ މަސްލަހަތަށް އިސްކަން ދިނުން
ތޯހާ އަށް ކޮމިޓީން ކުރި ތުހުމަތުތައް:
- އޭސީސީން ވަކިކުރި މުވައްޒަފެއްގެ މައްސަލަ ވަޒީފާއާ ބެހޭ ޓްރައިބިއުނަލުން ހައިކޯޓުގައި އިސްތިއުނާފުކޮށްފައި ވަނިކޮށް، ތޯހާގެ ނުފޫޒުން އެ އިސްތިއުނާފު ބާތިލްކޮށް، ކޮމިޝަންގެ ލީގަލް ޓީމުގެ ލަފަޔާ ހިލާފަށް ދެ ލައްކައަށް ވުރެ ބޮޑު ބަދަލެއް ނަގައިދިނުން
- ކުރީގެ ބަންޑާރަނައިބެއްގެ މައްޗަށް ތުހުމަތުކުރެވުނު މައްސަލައެއްގައި ދައުވާކުރެވޭ ވަރަށް ހެކި ހުރި ނަމަވެސް ދައުވާ ނުކުރެވޭނެ ކަމަށް ކަނޑައަޅައި މައްސަލަ ފައިލްކުރުމުގައި އިސް ދައުރެއް އަދާކުރުން
- އޭސީސީގެ މެންބަރުންނަށް އެހެން ވަޒީފާއެއް އަދާނުކުރެވޭނެ ކަމަށް އޮތް ނަމަވެސް، ރާއްޖޭގެ ލޯ ފާމެއްގެ އެޓާނީއެއްގެ ގޮތުގައި ހިމެނިފައިވުން
ސަލާމާއި ތޯހާގެ އިތުރުން، އިލެކްޝަންސް ކޮޮމިޝަންގެ ނައިބު ރައީސް އަލީ ނަޝާތާއި މެންބަރުން ޑރ. މުހައްމަދު ޒާހިރާއި މުހައްމަދު އާސިފް ވަކިކުރުމަށް ވެސް މިއަދުގެ ޖަލްސާއަށް ތާވަލުކޮށްފައިވެއެވެ. އެ ތިން ބޭފުޅުންގެ މައްޗަށް ވެސް ބޮޑެތި ތުހުމަތުތަކެއް ކޮމިޓީން ކޮށްފައިވެއެވެ.
