ޕްރައިވެޓް ފަރާތްތަކުން ގިނަ އަދަދެއްގެ ފައިސާ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ނުދައްކާ ހުރި ކަމަށް ހިތަދޫ މެދު ދާއިރާގެ މެމްބަރު އަހުމަދު އަޒާން މަރުޒޫގް ވިދާޅުވެއްޖެއެވެ.
އެ ކުންފުންޏަށް ލިބެންޖެހޭ ގިނަ އަދަދެއްގެ ފައިސާ ލިބުން ލަސްވުމާއެކު ހުސްވި އޮކްޓޯބަރު މަހު ވަނީ ފައިސާ ދެއްކުމަށް ވަކި މުހުލަތެއް ދީފައެވެ. މި ހިނގާ ނޮވެމްބަރު މަހުގެ 30 ވަނަ ދުވަހުގެ ނިޔަލަށް ފައިސާ ދައްކާ ހަލާސް ކުރަން ފަހު މުއްދަތެއް އެ ކުންފުނިން ދީފައިވާއިރު މި މުހުލަތުގައި ފައިސާ ނުދައްކާ ފަރާތްތަކުގެ ނަންތައް ވެބްސައިޓުގައި އާންމު ކުރާނެ ކަމަށް އެޗްޑީސީން ވަނީ ބުނެފައެވެ.
ފައިސާ އަނބުރާ ދެއްކުމުގެ މުހުލަތު ހަމަވާން ބާކީ ފަސް ދުވަސް އޮއްވާ ފައިސާ ނުދައްކާ ފަރާތްތަކުގެ ލިސްޓާއެކު 'އެކްސް'ގައި ހިއްސާ ކުރެއްވި ޕޯސްޓެއްގައި އަޒާން ވިދާޅުވީ، ޕްރައިވެޓް ފަރާތްތަކުން އެޗްޑީސީއަށް ނުދައްކާ ހުރި ފައިސާ ޖުމްލަ 900 މިލިއަނަށް އަރާ ކަމަށެވެ. އޭގެ ތެރޭގައި ނަން މަޝްހޫރު ބޮޑެތި ވިޔަފާރިތައްވެސް ހިމެނޭ ކަމަށާއި އަދި މިއީ ވަރަށް ސީރިއަސް މައްސަލައެއް ކަމަށް އޭނާ ވަނީ ވިދާޅުވެފައެވެ.
އަޒާން އާންމު ކުރެއްވި ލިސްޓުގައިވާ ބައެއް ކުންފުނި ތަކަކީ:
- އެންޕީއެޗް ޑިވަލޮޕްމަންޓް ޕްރަވައިޓް ލިމިޓެޑް - 215،202،8367.16 ރުފިޔާ
- ޖައުސާ އިންވެސްޓްމެންޓް - 99،496،440.44 ރުފިޔާ
- އައިލެންޑް އެކްސްޕާޓް ޕްރަވައިޓް ލިމިޓެޑް - 85،069،748.11 ރުފިޔާ
- ހަންބޯ ކޮމްޕެނީ ލިމިޓެޑް - 69،608،486 ރުފިޔާ
- ރެއިންބޯ މެގަ ޑިވެލޮޕާސް ޕްރަވައިޓް ލިމިޓެޑް - 68،945،332.71 ރުފިޔާ
- ޔޮޓް ޓުއާސް މޯލްޑިވްސް - 36،305،780.50 ރުފިޔާ
- އެންސިސް ފިޝަރީސް ޕްރަވައިޓް ލިމިޓެޑް - 27،156،615.81 ރުފިޔާ
- އަމީން ކޮންސްޓްރަކްޝަން ޕްރަވައިޓް ލިމިޓެޑް - 25،209،263.25 ރުފިޔާ
މީގެ އިތުރުން ވެސް ފައިސާ ނުދައްކާ ލިސްޓުގައި ގިނައަދަދެއްގެ ކުންފުނި ހިމެނެއެވެ.
އެޗްޑީސީގެ އިތުރުންވެސް ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކުރުމަށް ކުރެވޭ މަސައްކަތްތަކުގެ ތެރެއިން ކުންފުނިތަކަށް ލިބެންޖެހޭ ފައިސާ ހޯދުމާއި، ދަރަނި ކުޑަކުރުމަށް އެކުންފުނިތަކުން ދަނީ މަސައްކަތް ކުރަމުންނެވެ.
