2023 ވަނަ އަހަރާ އަޅާބަލާއިރު މި އަހަރުގެ މިހާތަނަށް ދިވެހިރާއްޖެއަށް މަސްތުވާތަކެތި އެތެރެކުރުމުގެ މައްސަލަތަކުގައި ދައުވާކޮށްފައިވާ މިންވަރު 112.5 ޕަސެންޓް އިތުރުވެފައިވާ ކަމަށް ޕްރޮސިކިއުޓާ ޖެނެރަލް އައްބާސް ޝަރީފް ވިދާޅުވެއްޖެއެވެ.
އައްބާސް މިފަދައިން ވިދާޅުވީ އެމެރިކާގެ ޑިޕާޓްމަންޓް އޮފް ޖަސްޓިސްގެ އޮފީސް އޮފް އޯވާސީސް ޕްރޮސިކިއުޓޯރިއަލް ޑިވަލޮޕްމަންޓް އެސިސްޓެންސް އެންޑް ޓްރެއިނިނިގް (އޯޕީޑީއޭޓީ) އިން މިމަހުގެ 17 އިން 21 އަށް ކްރޮސްރޯޑްސްގައި ބޭއްވި "ސައުތް އޭޝިއާ ރީޖަނަލް ކައުންޓާ ނާކޮޓިކްސް ޓްރެފިކިން ޕްރޮގްރާމް" ފައްޓަވައިދެއްވައި ވާހަކަ ދައްކަވަމުންނެވެ.
އައްބާސް ވިދާޅުވީ މިހާރު ހުށަހެޅިފައިވާ ގިނަ މައްސަލަތަކަކީ ވައިގެ މަގުން ދިވެހިރާއްޖެއަށް މަސްތުވާތަކެތި އެތެރެކުރުމުގެ މައްސަލަތައް ކަމަށެވެ. އެގޮތުން މި އަހަރުގެ މިހާތަނަށް ދިވެހިރާއްޖެއަށް މަސްތުވާތަކެތި އެތެރެކުރުމުގެ 17 ދައުވާ ކޯޓަށް ހުށަހަޅާފައިވާ ކަމަށާއި މަސްތުވާތަކެތި ޓްރެފިކް ކުރުމުގެ 190 ދައުވާ ކޯޓަށް ހުށަހަޅާފައިވާ ކަމަށް އައްބާސް ވިދާޅުވިއެވެ.
އައްބާސް ވިދާޅުވީ މިއީ މިދިޔަ އަހަރުގެ އޮކްޓޫބަރު މަހުގެ ނިޔަލަށް މަސްތުވާތަކެތި އެތެރެކުރުމުގެ މައްސަލަތަކުގައި ކުރި ދައުވާތަކާއި އަޅާ ބަލާއިރު 112.5 ޕަސެންޓް އިތުރު އަދަދެއް ކަމަށެވެ. އަދި މަސްތުވާތަކެތި ޓްރެފިކްކުރުމުގެ މައްސަލަތަކުގައި ދައުވާކުރެވިފައިވާ ނިސްބަތް 14 އިންސައްތަ އިތުރުވެފައިވާ ކަމަށެވެ.
މިކަމުން ދައްކުވައިދެނީ ގާނޫނު ތަންފީޒުކުރާ އިދާރާތަކުން މަސްތުވާތަކެތި ހިފަހައްޓާ މިންވަރު މި އަހަރު ތެރޭގައި އިތުރުވެފައިވާކަން ކަމަށް އައްބާސް ވިދާޅުވިއެވެ.
ދިވެހިރާއްޖޭގެ އިތުރުން ނޭޕާލް، ސްރީ ލަންކާ، ބަންގްލަދޭޝްގެ ޕްރޮސިކިއުޓަރުންނާއި އިންވެސްޓިގޭޓަރުންނާއި އެނަލިސްޓުން "ސައުތް އޭޝިއާ ރީޖަނަލް ކައުންޓާ ނާކޮޓިކްސް ޓްރެފިކިން ޕްރޮގްރާމް"ގައި ބައިވެރިވެފައި ވާއިރު، މި ޕްރޮގްރާމްގައި އެކި ގައުމުތުން މަސްތުވާތަކެއްޗާ ދެކޮޅަށް އަޅާފައިވާ ފިޔަވަޅުތަކާއި ބައިނަލްއަގްވާމީ ބެސްޓް ޕްރެކްޓިސްތަކާ ގުޅޭ ތަމްރީނުތައް ކުރިއަށް ގެންގޮސްފައި ވެއެވެ.
