ހުޅުމާލޭގައި މިދިޔަ އަހަރުގެ އޭޕްރީލް މަހު ހުޅުވި ކޭއެފްސީ އާއި ޕިއްޒާ ހަޓް ބަންދުކޮށްފިއެވެ.
މައުލޫމާތު ލިބިފައިވާ ގޮތުގައި މިދެތަން ބަންދު ކޮށްފައިވަނީ ވިޔަފާރި ދަށްވުމުގެ ސަބަބުންނެވެ. މިކަމާ ގުޅިގެން ޕިއްޒާ ހަޓު އަދި ކޭއެފްސީގެ ބަހެއް ލިބިފައިނުވާއިރު، ފަލަސްތީނުގެ ގާޒާގައި އިޒްރޭލުން ދެމުން ގެންދާ ހަމަލާތަކާ ދެކޮޅަށް އިޒްރޭލާ ގުޅުން އޮންނަ ވިޔަފާރިތައް ބޮއިކޮޓްކުރުމަށް ގިނަ އަދަދެއްގެ ބަޔަކު ވަނީ ނުކުމެ ބޮއިކޮޓް ހަރަކާތްތައް ހިންގާފައެވެ.
ރާއްޖޭގައިވެސް ބޮއިކޮޓް ހަރަކާތްތައް ހިންގާފައިވާއިރު، މާލޭގައި ހުންނަ ޕިއްޒާހަޓާއި ކޭއެފްސީގެ އިތުރުން ކޮކާ ކޯލާއަށް މިދިޔަ އަހަރު ވަނީ ބަޔަކު ކަޅު ތެޔޮވެސް ޖަހާފައެވެ. ޕިއްޒާހަޓާއި ކޭއެފްސީ އަދި ކޮކާ ކޯލާއަށް ކަޅުތެޔޮ ޖަހާފައި ވަނީ އެ ތަންތަނުގެ މައި ވިޔަފާރި ތަކުން އިޒްރޭލަށް ފަންޑު ކުރާ ކަމަށް ބުނެއެވެ. ރާއްޖޭގައި އެ ހުންނަނީ އެތަންތަނުގެ ފްރެންޗައިން ވިޔަފާރިތަކެވެ.
2023 ވަނަ އަހަރުގެ އޮކްޓޫބަރު 7 ވަނަ ދުވަހުން ފެށިގެން އިޒްރޭލުން ފަލަސްތީނަށް ހަމަލާތައް ދެމުން އަންނައިރު، މިހާތަނަށް ޝަހީދުވި މީހުންގެ ޖުމްލަ އަދަދު ވަނީ 43،686 އަށް އަރާފައެވެ. އޭގެތެރެއިން ޝަހީދުވި ކުޑަކުދިންގެ އަދަދަކީ 16950 ކަމަށް ރިޕޯޓްތަކުން ބުނެއެވެ. އަދި މި ވޭތުވެ ދިޔަ އަހަރު ދުވަހުގެ ތެރޭގައި ގާޒާއިން ޒަހަމްވި މީހުންގެ އަދަދު ވެސް މި ވަނީ 101،000 އިން މައްޗަށް އަރާފައެވެ.
މީގެއިތުރުން މިދިޔަ މަހުގެ 5 ވަނަ ދުވަހުން ފެށިގެން އިޒްރޭލުގެ ބާރުތަކުން އުތުރު ގާޒާގެ އެކި ސަރަހައްދުތަކަށް އެއްގަމު މަގުން ދޭ ހަމަލާތަކާއި ވައިގެ މަގުން ބޮން އެޅުން އެތައް ގުނައެއް ވަނީ އިތުރު ކޮށްފައެވެ. ދުނިޔެއިން ފަގީރުކަމާއި ބޭއިންސާފް ނައްތާލުމަށް މަސައްކަތް ކުރާ ޖަމިއްޔާއެއް ކަމަށް ވާ އޮކްސްފާމް އިން ބުނާ ގޮތުގައި އެ ސަރަހައްދަށް އެހީގެ އެއްވެސް ތަކެއްޗެއް ނުލިބޭ ކަމަށާއި އެތަނަށް އެހީ އެތެރެ ކުރުން އިޒްރޭލުން ހުއްޓުވާފައިވާ ކަމަށެވެ.
ފަލަސްތީނުގެ ބައެއް މީހުން ގާޒާގެ އުތުރުގައި ބަނޑުހައިހޫނުކަމުގެ ސަބަބުން މަރުވަމުންދާ ކަމަށާއި ކުރިއަށް އޮތް ދުވަސްތަކުގައި އިތުރު ބަޔަކު މަރުވާނެ ކަމުގެ އިންޒާރު ވެސް ވަނީ ދީފައެވެ.
