ފަލަސްތީނުގެ ގާޒާގައި ހިންގަމުންދާ ލާއިންސާނީ ޖަރީމާތަކުގެ ކުށުގައި އިޒްރޭލުގެ ބޮޑުވަޒީރު، ބެންޖަމިން ނަތަންޔާހޫ ހައްޔަރުކުރަން އިންޓަނޭޝަނަލް ކްރިމިނަލް ކޯޓް (އައިސީސީ) އިން އިއްޔެ ނެރުނު އަމުރަށް ރާއްޖެ އިން މަރުހަބާ ކިޔައިފިއެވެ.
އައިސީސީން އިއްޔެ ވަނީ އިޒްރޭލުގެ ބޮޑުވަޒީރު، ބެންޖަމިން ނަތަންޔާހޫ އާއި ކުރީގެ ޑިފެންސް މިނިސްޓަރު، ޔޮއޭވް ގަލަންޓް ހައްޔަރު ކުރަން އިންޓަނޭޝަނަލް ކްރިމިނަލް ކޯޓުން އަމުރެއް ނެރެފައެވެ.
މިދިޔަ އަހަރުގެ އޮކްޓޫބަރުން ފެށިގެން މި އަހަރުގެ މޭ މަހާ ހަމައަށް ހިންގި ލާއިންސާނީ ޖަރީމާތަކުގެ ކުށުގައި ނެރުނު އެ އަމުރުގައި ބުނެފައި ވަނީ ކާބޯތަކެއްޗާއި ފެނާއި ބޭހާއި ބޭސްފަރުވާގެ އިތުރުން ތެލާއި ކަރަންޓުގެ ހިދުމަތް ފަދަ ދިރިހުރުމަށް ކޮންމެހެން ބޭނުންވާނެ ޒަރޫރީ އެއްޗެހިން ގާޒާގެ ރައްޔިތުން ގަސްދުގައި މަހުރޫމު ކުރުވި ކަމަށް ބެލޭނެ ޖާގަ އެބަ އޮތް ކަމަށެވެ.
މި އަމުރާ ގުޅިގެން ރާއްޖޭގެ ރައީސުލްޖުމްހޫރިއްޔާ އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ އިންސާނިއްޔަތާ ހިލާފު އަދި ހަނގުރާމައިގެ ޖަރީމާތަކެއް ހިންގާފައިވާތީ ނަތަންޔާހޫ ހައްޔަރުކުރަން އައިސީސީން ނެރުނު އަމުރަށް ރާއްޖެ އިން ފުރިހަމަ އަށް އިހުތިރާމް ކުރާ ކަމަށެވެ.
"މިއީ ހަނގުރާމައިގެ ޖަރީމާތަކާއި އިންސާނިއްޔަތާ ހިލާފު ޖަރީމާތަކަށް ޖަވާބުދާރީކުރުވުމަށް އެޅުނު މުހިންމު ފިޔަވަޅެއް" ރައީސް ވިދާޅުވިއެވެ.
އަދި ހަަމަ އެހެންމެ ބައިނަލްއަގްވާމީ ގާނޫނުތައް ދަމަހައްޓައި، ފަލަސްތީނުގެ ރައްޔިތުންނަށް އިންސާފު ހޯދައިދިނުމަކީ ސަރަހައްދުގެ ހަމަޖެހުން ގާއިމުކުރުމަށް ކޮންމެހެން ބޭނުންތެރި ކަމެއް ކަމަށް ވެސް ރައީސް ވަނީ ވިދާޅުވެފައެވެ.
މިދިޔަ އަހަރުގެ އޮކްޓޫބަރު 8، އިން ފެށިގެން ގާޒާއަށް ވަދެގަނެ، އިޒްރޭލުން ހިންގަމުންދާ ލާ އިންސާނީ އަނިޔާތަކުގައި 41،000 އަށް ވުރެ ގިނަ މީހުން ވަނީ ޝަހީދުވެފައެވެ. އަދި ހަނގުރާމަ ފެށުނީއްސުރެ ވެސް ފަލަސްތީނުގެ ދިފާއުގައި ރާއްޖެއިން ވަކާލާތު ކުރަމުންދާއިރު ދާދިފަހުން ސައުދީ އަރަބިއްޔާގެ ވެރިރަށް ރިޔާޟްގައި މިހާރު ކުރިއަށްދާ ޖޮއިންޓް އަރަބް އިސްލާމިކް ސަމިޓުގައި ވެސް ފަލަސްތީނުގެ މިނިވަން ކަމާ ގުޅޭ ގޮތުން ރައީސް ވަނީ ވާހަކަފުޅު ދައްކަވާފައެވެ.
އެގޮޮތުން އިޒްރޭލުން ހިންގަމުންދާ ގަތުލުއާންމުގެ މައްސަލައިގައި ބައިނަލްއަގުވާމީ ބޮޑެެތި ގައުމުތަކުން ހަނުހުރެ، އިހުމާލުވެފައިވާތީ އެކަންވެސް ރައީސް އޭރު ފާހަގަ ކުރެއްވިއެވެ. ހަމައެހެންމެ އެމަނިކުފާނު ވަނީ އދ ގެ ސަލާމަތީ ކައުންސިލަށް ލިބިދީފައިވާ ވީޓޯގެ ބާރުގެ ސަބަބުން ފަލަސްތީނުގައި ހިންގަމުންދާ ގަތުލުއާންމު ހުއްޓުވުމަށް ފިޔަވަޅު ނޭޅި، އިޒްރޭލަށް ހަތިޔާރު ފޯރުކޮށްދިނުން ހުއްޓުވިފައިނުވާ ކަން ފާހަގަކުރައްވައިފައެވެ.
