އިންތިހާބުވާ ޕާޓީ ބަދަލުކުރުމުން އެ މީހަކު ރައްޔިތުންގެ މަޖިލީހުގެ މެންބަރުކަމުން ވަގުތުން ވަކިވާގޮތަށް ގާނޫނުއަސާސީ އިސްލާހުކުރަން ސަރުކާރުގެ ފަރާތުން ހުށަހެޅި އިސްލާހު ބަލައިގަނެފައިވާއިރު އެ އިސްލާހު ފާސްކުރުމުގެ ކުރިން އެކަމަށް ހިޔާލު ހުށަހެޅުމުގެ ފުރުސަތު ދިނުމަށް ބާ ކައުންސިލުން ރައްޔިތުންގެ މަޖިލީހުގައި އެދިއްޖެއެވެ.
ހުޅުދޫ ދާއިރާގެ މެންބަރު އަދި ޕީއެންސީގެ ޑެޕިއުޓީ ލީޑަރު މުހައްމަދު ޝާހިދު ގާނޫނުއަސާސީ އަށް ހުށަހެޅުއްވި އެ އިސްލާހު ބަލައިގަތީ އެކަމަށްޓަކައި ރިޔާސަތުން ވޯޓަށް އެހުމުން ވޯޓުގައި ބައިވެރިވި 81 މެންބަރުންގެ ތެރެއިން 69 މެންބަރުންގެ ވޯޓާ އެކުގައެވެ. އެ އިސްލާހު ބަލައިގަންނަން ނުފެންނަ ކަމަށް ވޯޓުދެއްވީ އެމްޑީޕީގެ 12 މެންބަރުންނެވެ.
މިކަމާ ގުޅިގެން ބާ ކައުންސިލުން ނެރުނު ބަޔާނެއްގައި ބުނެފައިވަނީ ގާނޫނުއަސާސީއަށް އިސްލާހު ގެނައުމުގެ ބިލެއް ރައްޔިތުންގެ މަޖިލީހަށް އިއްޔެ ހުށަހަޅާފައިވާތީ އެ ބިލާ ގުޅިގެން ބާ ކައުންސިލުގެ އާންމު މެމްބަރުންނާއި ގާނޫނީ ދާއިރާގެ އެކި ފަރާތްތަކުގެ ކަންބޮޑުވުންތައް އެބަ ހުރި ކަމަށާއި، އެ ބިލާ ގުޅިގެން ބާ ކައުންސިލުގެ އާންމު މެމްބަރުންގެ ހިޔާލާއި މަޝްވަރާ މަޖިލީހަށް ހުށަހެޅުމަކީ މުހިއްމު ކަމެއް ކަމަށެވެ.
މީގެއިތުރުން ގާނޫނުއަސާސީއަށް ގެނެވޭ އިސްލާހެއް ނުވަތަ ބަދަލަކީ ރައްޔިތުންގެ ބައިވެރިވުމާއި ހިޔާލާއެކު ފުޅާ ދާއިރާއެއްގައި މަޝްވަރާ ކުރެވިގެން ގެނެވޭ އިސްލާހުތަކަކަށް ވާންޖެހޭކަން ފާހަގަކޮށް ބާ ކައުންސިލުން ވަނީ އެ ބިލާ ގުޅޭގޮތުން ހުށަހަޅަން ބޭނުންވާ ހިޔާލުތައް ހުށަހެޅުމަށް އެކަށީގެންވާ ފުރުސަތެއް ލިބޭ ގޮތަށް ބިލުގެ ކަންކަން އިންތިޒާމު ކުރުމަށް ގޮވާލާފައެވެ.
ފާހަގަކޮށްލެވޭ ގޮތުގައި މި އިސްލާހު ބަލައިގަނެ ކޮމިޓީ މަރުހަލާ އަށް ފޮނުވާލާފައި ވަނީ އެންމެ ދެ ގަޑިއިރުތެރޭ ބަހުސްކުރުމަށް ފަހުގައެވެ. އަދި މި އިސްލާހު އިތުރަށް ދިރާސާކުރުމަށްޓަކައި މުޅި މަޖިލީހުގެ ކޮމިޓީގެ ބައްދަލުވުން ވެސް ކުރިއަށް ގެންދާނެ ކަމަށް، މަޖިލީހުގެ ރައީސް އަބްދުއްރަހީމް އަބްދުﷲ ވަނީ ވިދާޅުވެފައެވެ.
ޝާހިދު ހުށަހެޅުއްވި އިސްލާހު ފާސްވެއްޖެނަމަ، މި ތިން ހާލަތުން ކުރެ އެއް ހާލަތަކުން މަޖިލީހަށް އިންތިހާބުވާ މެންބަރުން ވަކިވާނެއެވެ.
- ވަކި ޕާޓީއަކުން ވާދަކޮށް މެންބަރުކަމަށް އިންތިހާބުވާ ފަހުން އެ މެންބަރަކު އެ ޕާޓީއަކުން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުން
- އެ މެންބަރަކު މިހާރު ތަމްސީލުކުރާ ޕާޓީން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުމުން
- އަމިއްލަގޮތުން ވާދަކޮށް އިންތިހާބުވާ މެންބަރުން ސިޔާސީ ޕާޓީއަކާ ގުޅުމުން
ސަރުކާރުން ގާނޫނުއަސާސީ އަށް މި އިސްލާހު ހުށަހެޅީ، ބެލެވޭ ގޮތުގައި މިހާރު އަމަލުކުރަމުންދާ އެންޓި-ޑިފެކްޝަން ގާނޫނުގެ ބަދަލުގައި، އެ ގާނޫނުގައިވާ މާއްދާތައް ސީދާ ގާނޫނުއަސާސީގައި ހިމެނުމަށެވެ.
