އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އުފައްދާފައިވާ ވީޑިއޯތަކެއް ބޭނުންކޮށްގެން ރައްޔިތުންގެ މަޖިިލީހުގެ މާމިގިލީ ދާއިރާގެ މެންބަރު އަދި ވިޔަފާރިވެރިޔާ ގާސިމް އިބްރާހިމްގެ ނަމުގައި ސްކޭމްއެއް ހިންގާތީ އެކަމަށް ސަމާލުވުމަށް ގާސިމް އެދިވަޑައިގެންފިއެވެ.
ގާސިމް އެކްސްގައި ކުރެއްވި ޕޯސްޓެއްގައި ވިދާޅުވީ ސޯޝަލް މީޑިއާގެ އެކިމަންސަތަކުގައި ހާއްސަކޮށް ޓިކްޓޮކް، އިންސްޓާގްރާމް އަދި ފޭސްބުކްގައި ގާސިމްގެ ފޮޓޯއާއި ވީޑިއޯ ބޭނުންކޮށްގެން، އާޓިފިޝަލް އިންޓެލިޖެންސް ގެ އެހީގައި ތައްޔާރުކޮށްފައިވާ ކްލިޕްތަކެއް ދައުރުކުރަމުންދާ ކަމުގައެވެ.
އެކިކަހަލަ އޮފްޝޯ ޓްރޭޑް ކުރުމަށާއި އިންވެސްޓްކޮށް އަވަހަށް ނަފާ ލިބޭނެ ފަދަ މާލީ މުއާމަލާތްތަކުގެ ގާސިމް ފުރުސަތު ހޯދައިދެއްވާ ކަމަށް ސޯޝަލްމީޑިއާގައި ދައުރުވަމުންދާ އޯޑިއޯ އަދި ވީޑިއޯ ކްލިޕްތަކުގައި ފާހަގަކޮށްފައިވެއެވެ.
ގާސިމް ވިދާޅުވީ ރާއްޖޭގެ ގައުމީ ބޭންކް މެދުވެރިވެ، ފައިދާ ލިބޭނޭ ގޮތް ހަމަޖެހޭނެ ކަމަށް ބަޔާންކޮށް ފަތުރަމުންދާ އޯޑިއޯ ވީޑިއޯ ކްލިޕްތަކަކީ ރައްޔިތުންނަށް އޮޅުވާލާ ޒަމާނީކޮށް ސްކޭމް ކުރުމުގެ ބޭނުމުގައި ހިންގަމުންދާ އޮޅުވާލުމުގެ ދަށުދަރަޖައިގެ އަމަލުތަކެއް ކަމަށެވެ.
އެފަދަ ކަންކަމަށް ސަމާލުވެ އެފަދަ އެއްވެސް ބާވަތެއްގެ ސްކޭމެއްގައި ނުޖެހުމަށް ގާސިމް އެދިވަޑައިގެންފައިވެއެވެ. އަދި އެއްވެސް މީހަކު އާޓިފިޝަލް އިންޓެލިޖެންސް މެދުވެރިކޮށް ތައްޔާރުކޮށްފައި ހުންނަ ހަގީގަތެއް ނެތް ވީޑިއޯ ކްލިޕް ފަދަ ތަކެތި ސޯޝަލް މީޑިއާގައި ޝެއާކޮށް ނުހެދުމަށް ވެސް ގާސިމް ވަނީ އެދިވަޑަގެންފައެވެ.
މަގޭ ބޮސްއަކީ ތިކަހަލަ ބޯގަޅި ކަންތައް ކުރާ ބޮސްއެންނޫ؟