އިންތިހާބުވާ ޕާޓީ ބަދަލުކުރުމުން އެ މީހަކު ރައްޔިތުންގެ މަޖިލީހުގެ މެންބަރުކަމުން ވަގުތުން ވަކިވާގޮތަށް ގާނޫނުއަސާސީ އިސްލާހުކުރަން ސަރުކާރުގެ ފަރާތުން ހުށަހަޅައިފިއެވެ.
ހުޅުދޫ ދާއިރާގެ މެންބަރު އަދި ޕީއެންސީގެ ޑެޕިއުޓީ ލީޑަރު މުހައްމަދު ޝާހިދު ގާނޫނުއަސާސީ އިސްލާހުކުރުމަށް ހުށަހެޅުއްވި ގޮތަކީ ރައްޔިތުންގެ މަޖިލީހަށް އިންތިހާބުވި މެންބަރަކު ވަކިވާ ގޮތްތައް ގާނޫނުއަސާސީގައި ހިމެނުމަށެވެ. އެގޮތުން މި އިސްލާހު ފާސްވެއްޖެ ނަމަ މަޖިލީހަށް އިންތިހާބުވާ މެންބަރަކު ވަކިވާނެ ހާލަތްތަކަކީ:
- ވަކި ޕާޓީއަކުން ވާދަކޮށް މެންބަރުކަމަށް އިންތިހާބުވާ ފަހުން އެ މެންބަރަކު އެ ޕާޓީއަކުން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުން
- އެ މެންބަރަކު މިހާރު ތަމްސީލުކުރާ ޕާޓީން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުމުން
- އަމިއްލަގޮތުން ވާދަކޮށް އިންތިހާބުވާ މެންބަރުން ސިޔާސީ ޕާޓީއަކާ ގުޅުމުން
މި އިސްލާހުގައިވާ ގޮތުން، ދުވަސް ގުނަން ފަށާނީ މެންބަރުން ރައްޔިތުންގެ މަޖިލީހަށް އިންތިހާބުވުމަށް ފަހު، މެންބަރުކަމުގެ ހުވާ ކުރާ ދުވަހުން ފެށިގެންނެވެ. މި އިސްލާހު ހުށަހަޅާފައިވާ ގޮތުން، ރައްޔިތުންގެ މަޖިލީހުގެ އިންތިހާބާއި މެންބަރުކަމުގެ ހުވާކުރާ ތާރީހާ ދެމެދު ޕާޓީ ބަދަލުކުރުމަކުން މެންބަރުކަމުން ވަތްކެއް ނުވާނެއެވެ.
ސަރުކާރުން ގާނޫނުއަސާސީ އަށް މި އިސްލާހު ހުށަހެޅީ، ބެލެވޭ ގޮތުގައި މިހާރު އަމަލުކުރަމުންދާ އެންޓި-ޑިފެކްޝަން ގާނޫނުގެ ބަދަލުގައި، އެ ގާނޫނުގައިވާ މާއްދާތައް ސީދާ ގާނޫނުއަސާސީގައި ހިމެނުމަށެވެ.
19 ވަނަ މަޖިލީހުން ފާސްކުރި އެންޓި-ޑިފެކްޝަން ގާނޫނުގައިވާ ގޮތުން، ރައްޔިތުންގެ މަޖިލީހުގެ މެންބަރުންގެ އިތުރުން ކައުންސިލަރުންނާއި އަންހެނުންގެ ކޮމިޓީތަކުގެ މެންބަރުން ވެސް، މަގާމުގެ މަސްއޫލިއްޔަތުތައް އަދާކުރަން ފަށާ ދުވަހުން ފެށިގެން އެ ހިނގާ މުއްދަތުގައި ޕާޓީ ބަދަލުކޮށްފިނަމަ ނުވަތަ ތަމްސީލުކުރާ ޕާޓީއަކުން ވަކިކޮށްފިނަމަ، ނުވަތަ ވަކިވެއްޖެ ނަމަ އެ އިންތިހާބުވާ މީހާ ހަތް ދުވަހުގެ ތެރޭގައި އިސްތިއުފާ ދޭން ޖެހޭނެ ކަމަށް ވެއެވެ.
އެމަކަކު އެގޮތަށް އިސްތިއުފާ ނުދީފިނަމަ އަމަލުކުރާނެ ގޮތެއް އެ ގާނޫނުގައި ބަޔާނެއް ނުކުރެއެވެ. އެހެންކަމުން އަމިއްލަ ފަރާތަކުން ވަނީ އެ މައްސަލަ ކޯޓަށް ވެސް ހުށަހަޅައިފައެވެ.
