ރާއްޖޭގައި ބޯހިޔާވަހިކަމުގެ މަޝްރޫއުތައް ހިންގުމަށް އުފައްދާފައިވާ ފަހި ދިރިއުޅުން ކޯޕަރޭޝަން (އެފްޑީސީ)ގެ އެއް ބިލިއަން ރުފިޔާގެ ހިއްސާގެ ބަދަލުގައި ފިނޭންސް މިނިސްޓްރީން 19 ބިމެއް އެ ކޯޕަރޭޝަނަށް މިލްކު ކޮށްދީފިއެވެ.
ފިނޭންސް މިނިސްޓްރީގެ ނަމުގައި އޮތް 19 ބިމެއް ސަރުކާރުން އެފްޑީސީއަށް ދިނީ ސަރުކާރުން އަގު އަދާނުކޮށް އޮތް 107 މިލިއަން ހިއްސާގެ ތެރެއިން 103 މިލިއަން ހިއްސާއަށްވާ އަގުގެ ގޮތުގައެވެ.
އެ ބިންތަކުގެ އަގުގެ ގޮތުގައި ދެ ފަރާތުން އެއްބަސްވެފައިވަނީ 1.3 ރުފިޔާ އެވެ. ސިވިލް ކޯޓުން މި މުއާމަލާތަކީ ސައްހަ މުއާމަލާތެއް ކަމަށް ކަނޑައަޅާފައިވާއިރު އެފްޑީސީއަކީ ސަރުކާރުން 100 ޕަސެންޓް ހިއްސާވާ ކުންފުންޏެކެވެ.
އެ ކުންފުނީގެ 200 މިލިއަން ހިއްސާގެ އަގަކީ ދެ ބިލިއަން ރުފިޔާއެވެ.
އެފްޑީސީ، ރާއްޖޭގެ އާބަން ޑިވެލޮޕްމަންޓާއި ގުޅޭ މައި ކުންފުނި ކަމަށްވާ ހައުސިން ޑިވެލޮޕްމެންޓު ކޯޕަރޭޝަން ( އެޗްޑީސީ ) ގެ ސަބްސިޑަރީއަކަށް ބަދަލުކުރުމަށް ނިންމާފައިވާއިރު މިކަމާއި ގުޅިގެން މީގެ ކުރިން ސަރުކާރުން ބުނީ އެފްޑީސީން ކުރާ މަސައްކަތްތަކަކީ ހަމައެކަނި މާލެ ސަރަހައްދަށް އެކަނި އަމާޒުކުރެވޭ މަސައްކަތްތަކަކަށް ނުވެ، މުޅި ރާއްޖޭގައި ވެސް އަސާސީ ބޯހިޔާވަހިކަން ސޯޝަލް ހައުސިން ފޯރުކޮށްދިނުމަށް އެންމެ ބޮޑު ރޯލެއް ކުޅޭނެ ކުންފުންޏަކަށް އެކުންފުނި ވެގެން ދާނެކަމަށެވެ.
