އާސަންދަ އަށް 'ކެންސަރު' ޖެހިފައިވާކަން ސިފަކުރައްވައި، އާސަންދަ ދޫކޮށްލައި އެހެން ގޮތެއް ހޯދުމާ މެދު ވިސްނަން ޖެހިފައިވާ ކަމަށް، ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް ވިދާޅުވެއްޖެއެވެ.
އަންނަ އަހަރަށް ލަފާކޮށް ހުށަހަޅާފައިވާ ދައުލަތުގެ ބަޖެޓަށް ބަހުސްކުރައްވަމުން ނާޒިމް ވިދާޅުވީ، ސިއްހީ ދާއިރާއަށް ކުރިމަތިވެފައިވާ ދަތިތަކުގެ ތެރޭގައި އާސަންދަ އާއި އެންސްޕާއިން ކުރާ ބޭކާރު ހަރަދުތައް ހިމެނޭ ކަމަށެވެ.
ލޮލަށް ޖަހާ އަގުބޮޑު އިންޖެކްޝަނެއް ބޮޑުއަގުގައި ވިއްކަމުންދާ މައްސަލައެއް ދާދިފަހުން ފެންމަތިވެފައިވާތީ އެކަމަށް އިޝާރާތްކުރައްވައި ނާޒިމް ވިދާޅުވީ، 500 ޑޮލަރަށް ލިބޭ އެ އިންޖެކްޝަން ގަތުމަށް ކޮންމެ މީހަކު ވެސް 24 ހާސް ރުފިޔާ ހަރަދުކުރަން ޖެހޭ ކަމަށް ނޫހެއްގައި ލިޔެފައި އޮއްވާ ފެނުނު ކަމަށާއި، އެ އިންޖެކްޝަން ސަޕްލައިކުރި ކުންފުންޏަށް އާސަންދައިން ދެ އަހަރު ތެރޭ 24 މިލިއަން ރުފިޔާ ދިން ކަމަށް، އާސަންދައިގެ އިސްވެރިޔަކު ވިދާޅުވި ކަމަށެވެ.
އެ އިންޖެކްޝަންތަކުގެ ހަމަ އަގު ފަސް މިލިއަން ރުފިޔާ އަށް ވެސް ނާރާ ކަމަށް ނާޒިމް ވިދާޅުވިއެވެ.
މީގެ އިތުރުން، ވެރިކަން ބަދަލުވާ ކޮންމެ ފަހަރަކު ހޮސްޕިޓަލްތަކުގައި ހުންނަ މެޝިންތައް ބަދަލުވަމުންދާ ކަން ވެސް އޭނާ ފާހަގަކުރެއްވިއެވެ.
"އާސަންދަ މި ވަނީ ރަނގަޅުނުކުރެވޭ ވަރަށް ރިފޯމް ނުކުރެވޭ ވަރަށް ގޯސްވެފަ، އަސްލު ކެންސަރު ޖެހިފަ ވަނީ އާސަންދަ އަށް، އަޅުގަނޑުމެން އެއާ މޯލްޑިވްސްއާ އެހެން ކުންފުނިތައް ވެސް ދޫކޮށްލި ފަދައިން އާސަންދަ ދޫކޮށްލާފައި އަލުން ބަލުން ފަށަންވީ ކަމާ ދޭތެރޭ ވަރަށް ފުންކޮށް ވިސްނަން އެބަޖެހޭ،" ނާޒިމް ވިދާޅުވިއެވެ.
ނާޒިމް ވިދާޅުވީ، ބޭރުގެ ހޮސްޕިޓަލްތަކާ އެކު އާސަންދައިން ހަދާފައިވާ އެއްބަސްވުންތަކުގައި މެދުވެރިއަކު ހުންނަކަން ޔަގީންކުރެވޭ ކަމަށެވެ. ސަބަބަކީ އެ ހޮސްޕިޓަލްތަކުން ޗާޖްކުރާ އަގުތަކަކީ ގަބޫލުކުރަން ދަތިވާ ވަރަށް ބޮޑު އަގުތަކެއް ކަމުގައި ވާތީ ކަމަށް އޭނާ ވިދާޅުވިއެވެ.
އެހެންކަމުން އާ ކުންފުންޏެއް ހަދައި އެ އެއްބަސްވުންތައް އުވާލައި އާސަންދަ އަލުން ހަމަމަގަށް އަޅުވަން ޖެހޭ ކަމަށް ނާޒިމް ވިދާޅުވިއެވެ.
