މާލެ ރައްޔިތުންނަށް ބޯހިޔާވަހިކަން ފޯރުކޮށް ދިނުމަށް ގެދޮރުވެރިންގެ ސްކީމްގެ ދަށުން ދޫކުރުމަށް އިއުލާން ކުރި 4000 ފްލެޓްގެ ދާއިމީ ލިސްޓްގައި ނުފޫޒުން އުސޫލާ ހިލާފަށް ގިނަ ބަޔަކަށް ފްލެޓް ދޭން މަސައްކަތް ކޮށްފައިވާ ކަމަށާއި، އެހެންވީމާ ލިސްޓް އާންމު ކުރުން ލަސްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ، ސަރުކާރަށް 52 ހަފްތާ ފުރުމުގެ މުނާސަބަތުގައި މިރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މާލެ ސަރަހައްދުން 4000 ފްލެޓް ދޫކުރުމަށް އާންމު ކުރި ފްލެޓް ލިސްޓްގައި ހުރި މައްސަލަތަކުގެ ތެރެއިން އުސޫލާ ހިލާފަށް ކޮށްފައިވާ ކަންކަން ހާމަ ކުރައްވަމުން ރައީސް މުއިއްޒު ވިދާޅުވީ، ކުރީގެ ފްލެޓް ކޮމިޓީގައި ހިމެނޭ ފަރާތްތަކަށް ފްލެޓް ލިބޭ ގޮތަށް މާކްސް ބަދަލުކޮށްފައި އެބަހުރި ކަމަށެވެ. ހަމައެއާއެކު އުސޫލާ ހިލާފަށް ކުރީ ސަރުކާރުގެ އިސް ވެރިންނަށް ފްލެޓް ލިބޭ ގޮތަށް ލިސްޓްގައި ހިމަނާފައި އެބަހުރި ކަމަށް ރައީސް ވިދާޅުވިއެވެ. ނުފޫޒު ބޭނުން ކޮށްގެން އެއް އާއިލާއެއްގެ ގިނަ މެންބަރުންނަށް ފްލެޓް ބަހާފައި އެބަ ހުރި ކަމަށް ވެސް ރައީސް ވިދާޅުވިއެވެ.
ހުށަހެޅި ލިޔުންތަކުގައި ހުރި މައްސަލަތައް ފާހަގަ ކުރައްވަމުން ރައީސް ވިދާޅުވީ، ޕޯޓަލް މެދުވެރިކޮށް ފޯމް ހުށަހަޅަން ޖެހުނު ނަމަވެސް ޕޯޓަލް އިން ފޯމް ހުށަނާޅާ ފަރާތްތައް ވެސް އެ ލިސްޓުގައި ހިމަނާފައިވާ ކަމަށެވެ. ހަމައެއާއެކު ޕޯޓަލް އިން މާކްސް ދިނުމުގައި ވެސް މައްސަލަތައް ވެސް ހުރި ކަން ރައީސް ފާހަގަ ކުރެއްވިއެވެ.
ފޯމް ހުށަނާޅާ ހަމައެކަނި އައިޑީ ކާޑުގެ ކޮޕީއެއް ހުށަހެޅީމައި ވެސް ފްލެޓް ދޭ ލިސްޓްގައި ހިމަނާފައި އެބަހުރި ކަމަށާއި އަދި އެއީ ވެސް އައިޑީކާޑުގެ އެއްފަޅި ހުށަހަޅައިގެން ކަމަށް ރައީސް މުއިއްޒު ވިދާޅުވިއެވެ.
މިފަދަ މައްސަލަތައް ހުރުމުން ފްލެޓް ލިސްޓް އާންމު ކުރުން ލަސްވަމުން އަންނަ ކަމަށާއި މިހެން ކަން ވެފައި އޮތުން ލަސްވާނެ ކަމަށް މުއިއްޒު ވިދާޅުވިއެވެ. އެހެންކަމުން މި މައްސަލަތައް ބަލައި އިންސާފު ވެރިކަމާ އެކު ފްލެޓް ލިސްޓް އިއުލާން ކުރާނެ ކަމަށް ރައީސް މުއިއްޒު ވިދާޅުވިއެވެ.
ﷲ ގަންދީ ހުވާ ކުރައްވައިގެން ވެރިކަމާ ހަވާލުވެވަޑައިގަތީ އިހްލާސްތެރިކަމާއި އަމާނާތްތެރިކަމާއެކު ހިދުމަތް ކުރެއްވުމަށް ކަން ފާހަގަ ކުރައްވަމުން ރައީސް ވިދާޅުވީ، ފްލެޓް ލިސްޓު އާންމު ކުރާނީ އުސޫލާ އެއްގޮތަށް ޕޮއިންޓް ނިޒާމާ އެއްގޮތަށް އެންމެ މަތިން ތިރިއަށް ތަރުތީބުން އަންނަ 4000 މީހުންނަށް ކަމަށެވެ. ގަވައިދާ ހިލާފަށް ފްލެޓަށް އެދި ފޯމް ހުށަހަޅާފައިވާ ފަރާތްތަކާއި ޑޮކިއުމަންޓްތައް އޮޅުވާލައިގެން ފޯމް ލާފައިވާ މީހުން މި ލިސްޓުން ކެންސަލް ވާނެ ކަމަށް ރައީސް ވިދާޅުވިއެވެ.
އުސޫލާ ހިލާފަށް ގިނަ ބަޔަކަށް ފްލެޓް ދިނުމަށް މަސައްކަތް ކޮށްފައިވާތީ އެކަންކަން ބަލައި އިންސާފްވެރިކަމާއި ތެދުވެރިކަމާ އެކު ފްލެޓް ދޭން ކުރާ މަސައްކަތް ނިމުމަކަށް އައުމަށް ލަސްތަކެއް ވެދާނެ ކަމަށް ރައީސް ވިދާޅުވިއެވެ. ލަސްވިޔަސް އަމާނާތްތެރިކަމާއެކު ފްލެޓް ހައްގުވާ ފަރާތްތަކަށް ދޭނެ ކަމުގެ ޔަގީން ކަން އެމަނިކުފާނު ދެއްވިއެވެ. ދާއިމީ ލިސްޓް އާންމު ކުރާ އިރު އެ ލިސްޓަ އޮންނާނީ ދެފުށް ފެންނަ ގޮތަކަށް ކަމަށާއި ފްލެޓް ލިބޭ މީހުންނާއި ނުލިބޭ މީހުން ސާފުކޮށް ބަޔާން ކުރައްވާނެ ކަމަށާއި ސަބަބު ވެސް ވަރަށް ސާފުކޮށް އެ ލިސްޓުގައި ބަޔާން ކުރައްވާނެ ކަމަށް ރައީސް ވިދާޅުވިއެވެ.
