ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރަށް އެއް އަހަރު ފުރިގެންދާއިރު މި ފާއިތުވި 52 ހަފްތާގެ ކޮންމެ ދުވަހަކީ ރާއްޖޭގެ އިގްތިސާދު ނަގާ ކޮޅަށް ޖެހުމަށް މަސައްކަތްކުރި ދުވަސްތަކެކެވެ. ފާއިތުވި އެއް އަހަރަކީ އިގްތިސާދީ ހީނަރުކަމާއެކުވެސް އެކި ދާއިރާތައް ކުރިއެރުވުމަށް ދިމާވި ގޮންޖެހުންތަކާއެކު، ކާމިޔާބީ އާއި ހަމައަށް ވާސިލުވުމުގެ އަލި މަގެއް ފެނިގެން ދިޔަ އަހަރެކެވެ. މި ގޮތުން މަސްވެރިކަމުގެ ދާއިރާ ކުރިއެރުވުމަށް ސަރުކާރުން ވަނީ ގިނަ މަސައްކަތްތަކެއް ފަށާފައެވެ.
ކުރީ ސަރުކާރު ނިމުނު އިރު، މަސްވެރިންނަށް ފައިސާ ނުދީ، 250 މިލިއަނެއްހާ ރުފިޔާގެ ބެކްލޮގެއް އޮތް އިރު ރައީސް ޑރ. މުހައްމަދު މުއިއްޒުގެ ސަރުކާރުން ވަނީ އެ ފައިސާއާ އެކުގައި މިހާތަނަށް އައިއިރު، މަސްވެރިންނަށް 1.1 ބިލިއަނަށް ވުރެ ގިނަ ރުފިޔާ ދީފައެވެ. މީގެ ކުރިން މަސްވެރިންނަށް ދޭންޖެހޭ ފައިސާ ނުދިނުމުގެ ސަބަބުން މުޒާހަރާ ކޮށްފައިވާއިރު ސަރުކާރުން އަންނަނީ މަސްވެރިންގެ ކަންބޮޑުވުންތައް ހައްލުކުރުމަށް ގިނަ މަސައްކަތްތަކެއް ކުރަމުންނެވެ.
މީގެ އިތުރުން މަސްވެރި ކަމަށް ހާއްސަކުރި މަސްވެރި ވުޒާރާއިން އެންމެ ހާއްސަ ކަމެއް ދިން އެއް ކަމަކީ މަސްވެރި ކޮލެޖެއް އުފެއްދުމަށް މަސްވެރި ގާނޫނުން ލާޒިމު ކޮށްފައިވާ މަސައްކަތް އަވަހަށް ނިންމުމެވެ. މަސްވެރިކަމާ ގުޅުން ހުރި ތައުލީމާއި ތަމްރީނު ނިޒާމީ ގޮތެއްގައި ކިޔަވައި ދޭނެ މަދަރުސާއެއް ނުވަތަ ކޮލެޖެއް މިހާތަނަށް ވުޖޫދުވެފައެއް ނެތެވެ. މަސްވެރި ކޮލެޖަކީ ދެމެހެއްޓެނިވި ގޮތަށް ނިޒާމެއްގެ ތެރެއިން ހިނގާނެ ކޮލެޖަކަށް ހެދުމަށްޓަކައި މި މަސައްކަތް ދިވެހިރާއްޖޭގެ ގައުމީ ޔުނިވާސިޓީއާ ގުޅިގެން އެ ޔުނިވާސީޓީގައި "މޯލްޑިވްސް ކޮލެޖު ފޯ ފިޝަރީޒް އެންޑް އޯޝަން ސައިންސަސް" ގެ ނަމުގައި މިހާރު ވަނީ އުފައްދާފައެވެ.
މޯލްޑިވްސް ނެޝަނަލް ޔުނިވާސިޓީގެ ދަށުން މަސްވެރި ކޮލެޖް ހިންގުމުގެ މަޝްވަރާ ފަށާފައިވަނީ ނޮވެމްބަރު 29، 2023 ވަނަ ދުވަހުގައެވެ. އަދި ފިޝަރީޒް ކޮލެޖް ގާއިމް ކުރުމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާ އާއި ދިވެހިރާއްޖޭގެ ގައުމީ ޔުނިވާސިޓީ އާ ދެމެދު ފަހުމުނާމާގައި ސޮއިކުރެވިގެން ދިޔައީ ޑިސެމްބަރު 27، 2023 ވަނަ ދުވަހުއެވެ. ސެޕްޓެމްބަރު 1، 2024ގައި މޯލްޑިވްސް ކޮލެޖު ފޯ ފިޝަރީޒް އެންޑް އޯޝަން ސައިންސަސް އުފައްދާ މަސްވެރި ސިނާއަތާ ގުޅުންހުރި ކޯސްތައް ހިންގުމަށްވަނީ ފަށާފައެވެ. އޭގެ ތެރޭގައި ބެޗެލާ އޮފް މެރިން ސައިންސް ކޯސް ހިމެނެއެވެ. މީގެ އިތުރުން ސްޕޯޓސް ފިޝިންއާއި މަސް ޕްރޮސެސްކުރަން ދަސްކޮށްދޭ ކޯހަށްވެސް ހުޅުވާފައިވެއެވެ.
ފަތުރުވެރިކަން ތަރައްގީވަމުން އަންނައިރު ފަރުމަހަށް އޮންނަ ޑިމާންޑް އިތުރުވަމުންދާކަމަށާއި މިއީވެސް ކުރިއަރަމުން އަންނަ ސިނާއަތެއްކަމަށް މިނިސްޓަރު ޝިޔާމްވަނީ ވިދާޅުވެފައެވެ. ފަރުމަސްވެރިންގެ ޝަކުވާތައް އަޑުއަހާލުމުން އިނގިގެންދިޔައީ މީގެކުރިން ފަރުމަސްވެރިންގެ ކަންބޮޑުވުންތަކަށް ސަރުކާރުތަކުން އެއްވެސް އިޖާބައެއް ދީފައެއް ނުވާކަންކަމަށްވެސް މިނިސްޓަރު ވިދާޅުވެފައިވާއިރު މި ސަރުކާރުން ވަނީ ފަރުމަސްވެރިކަމަށް ހާއްސަ ލޯނެއް ތައާރަފުކޮށްފައެވެ. 7 ލައްކަ ރުފިޔާއާއި ހަމައަށް ފަރުމަސްވެރިކަން ކުރާ ފަރާތްތަކަށް މި ލޯނު މެދުވެރިކޮށް ފައިސާ ލިބިގެންދާއިރު މި ލޯނަށް އެދި ހުށަހެޅި 121 ފަރާތްތަކުގެ ތެރެއިން 62 ފަރާތެއްގެ ލޯނު އެޕްރޫވްވެ، އޭގެތެރެއިން 37 ފަރާތަކަށް މިހާރު މި ލޯނު ވަނީ ދޫކޮށްފައެވެ. ފުރަތަމަ ފަރުމަސްވެރިކަމަށް ދޫކުރެވުނު ލޯނަކީ 30 މިލިއަން ރުފިޔާގެ ލޯނެކެވެ. މިއީ ރަހުނެއް ބަހައްޓަން ނުޖެހޭ ލޯނެކެވެ. ލޯނު ދައްކަން 10 އަހަރު ދުވަހަށް ބަހާލެވިފައިވާއިރު މިއީ ފަރުމަސްވެރިކަމުގެ ސިނާއަތު ކުރިއެރުވުމަށް އެއްވެސް ސަރުކާރަކުން ކޮށްފައިވާ މަސައްކަތެއް ނޫނެވެ.
