ފަލަސްތީނުގެ މިނިވަންކަން އިއުލާނު ކުރިތާ 36 އަހަރު ފުރުމުގެ މުނާސަބަތުގައި އެ ގައުމުގެ ރައީސް ޑރ މަހްމޫދު އައްބާސް އާއި ބޮޑުވަޒީރު އަދި ހާރިޖީ ވަޒީރު މުހައްމަދު މުސްތަފާއަށް ރައީސް ޑރ. މުހައްމަދު މުއިއްޒު މެސެޖެއް ފޮނުއްވައިފިއެވެ.
ފަލަސްތީނުގެ ރައީސާއި ބޮޑުވަޒީރަށް ރައީސް ވަކިވަކިން ފޮނުއްވި މެސެޖުގައި ފަލަސްތީނުގެ މިނިވަންކަން އިއުލާން ކުރިތާ 36 އަހަރު ފުރުމުގެ މުނާސަބަތުގައި ހެޔޮ އެދުންތައް ފޮނުއްވާފައިވެއެވެ.
ފަލަސްތީނުގެ ރައްޔިތުން އަނިޔާވެރިކަމާއި ބޭއިންސާފާ ދެކޮޅަށް ކުރަމުން ގެންދާ މަސައްކަތުގައި އެ ރައްޔިތުންގެ ސާބިތުކަމާއި ހިތްވަރުގަދަކަމަށް ރައީސް ވަނީ ނުހަނު ތައުރީފު ކުރައްވާފައެވެ.
ރައީސްގެ މެސެޖުގައި ދިވެހިރާއްޖޭގެ އެއްބާރުލުން އަބަދުވެސް ފަލަސްތީނަށް ލިބެމުންދާނެކަމުގެ ޔަގީންކަން ދެއްވާފައިވެއެވެ. އަދި 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސްއަކީ ވެރިރަށް ކަމުގައި ކަނޑައެޅިފައިވާ ފަލަސްތީނުގެ މިނިވަން އަދި އިސްތިގްލާލީ ދައުލަތަކަށް ދިވެހިރާއްޖެއިން އަބަދުވެސް ވަކާލާތުކުރައްވާނެކަމުގެ ޔަގީންކަން ވެސް އެމަނިކުފާނުގެ މެސެޖުގައި ދެއްވާފައިވެއެވެ.
މީގެއިތުރުން ރައީސްގެ މެސެޖުގައި ފަލަސްތީނުގެ ރައީސް ޑރ މަހްމޫދު އައްބާސްއަށާއި ބޮޑުވަޒީރު އަދި ހާރިޖީ ވަޒީރު މުހައްމަދު މުސްތަފާއަށާއި ފަލަސްތީނުގެ ރައްޔިތުންނަށް ދެމެހެއްޓެނިވި ސުލްހައާއި ކުރިއެރުމަށް އެދިވަޑައިގެންފައިވެއެވެ.
