ޑްރަގް ކެފޭގެ ގޮތުގައި ބޭނުންކުރަމުން ދިޔަ 48 ތަނެއް ބަންދުކޮށް މާލޭގައި މަސްތުވާތަކެތީގެ މުއާމަލާތް ހިންގާ ކަމަށް ތުހުމަތުކުރެވޭ ތަންތަނުގައި ޑިއުޓީ ކުރަމުން އަންނަ ކަމަށް ފުލުހުން ބުނެފިއެވެ.
މިއަދު ބޭއްވި ނޫށްވެރިންގެ ބައްދަލުވުމުގައި ވާހަކަ ދައްކަވަމުން ޑްރަގް އެންފޯސްމަންޓް ޑިޕާޓްމަންޓުގެ ހެޑް، ސުޕްރިޓެންޑެންޓް އޮފް ޕޮލިސް ނާހިދު ހުސެއިން ވިދާޅުވީ، ކެފޭ އުސޫލުން މަސްތުވާތަކެތި ބޭނުންކުރުމުގެ ފުރުސަތު ދޭ ތަންތަނުގެ ތެރެއިން 48 ތަނެއް ބަންދުކޮށްފައިވާ ކަމަށާއި 49 މީހަކު މަސްތުވާތަކެތިން ސަލާމަތް ކުރުމަށް ފަރުވާއަށް އެންޑީއޭ އާ ހަވާލުކޮށްފައިވާ ކަމަށެވެ. އެންޑީއޭ އާ ހަވާލުކޮށްފައި ވަނީ މަސްތުވާތަކެއްޗަށް ދެވި ހިފާފައި ތިބި މީހުންނާއި މަސްތުވުމަށް ސަލާން ޖަހާ މީހުން އަދި ތަކުރާރުކޮށް ޖިނާއީ ކުށްކުރާ މީހުން ކަމަށް އޭނާ ވިދާޅުވިއެވެ.
މިހާތަނަށް ޑްރަގްސްގެ 683 މައްސަލައެއް ފުލުހުންނަށް ރިޕޯޓުކޮށްފައިވާ އިރު، އޭގެ ތެރެއިން 345 މައްސަލައެއްގެ ތަހުގީގު ނިންމައި ޕީޖީ އޮފީހަށް ފޮނުވާފައިވާ ކަމަށް ނާހިދު ވިދާޅުވިއެވެ. އޭގެ ތެރެއިން ޑްރަގް ޓްރެފިކިންގެ 19 މައްސަލައެއްގައި 22 މީހެއްގެ މައްޗަށް ދައުވާ ސާބިތުވާ ކަމަށް ކްރިމިނަލް ކޯޓާއި ހުޅުމާލެ ކޯޓުން ހުކުމް ކޮށްފައިވާ ކަމަށް އޭނާ ވިދާޅުވިއެވެ.
މިހާތަނަށް ހުށަހަޅާފައިވާ މައްސަލަތަކުގައި 1009 މީހަކު ހައްޔަރުކޮށް 12،561 މީހުން ފާސްކޮށްފައިވެއެވެ. އަދި ޑްރަގާ ދެކޮޅަށް 12 އަތޮޅެއްގައި 158 އޮޕަރޭޝަނެއް ހިންގާފައި ވެއެވެ. ރާއްޖެއަށް އެތެރެކުރި ތަކެއްޗާއި އެކު ހިންގި ޑްރަގް އޮޕަރޭޝަންތަކުން ޖުމްލަ 183 ކިލޯއަށް ވުރެ ގިނަ ޑްރަގްސް އަދި 8400 އަށްވުރެ ގިނަ ބަނގުރާ ފުޅި އަތުލައިގެންފައި ވެއެވެ. އެ ތަކެތީގެ މަގުމަތީ އަގު 385 މިލިއަނަށް ވުރެ ގިނަ ރުފިޔާއަށް އަރައެވެ.
ޑްރަގްސްގެ މައްސަލަތަކުގައި މިހާތަނަށް 142 ބިދޭސީން ޑިޕޯޓުކުރުމަށް އިމިގްރޭޝަނާ ވަނީ ހަވާލުކޮށްފައެވެ. އޭގެ އިތުރުން ބަނގުރަލުގެ ވަގު ވިޔަފާރި ހުއްޓުވަން ސަފާރީތަކަށް އަމާޒުކޮށް ހިންގި އިންސްޕެކްޝަންގައި 58 ސަފާރީއެއް ވެސް ވަނީ ބަލާ ފާސްކޮށްފައެވެ.
