ދިވެހި ދައުލަތަށް ދިގު މުއްދަތަށް ހިދުމަތްކުރުމުގެ އިނާމު ލިބުނު 5 މުވައްޒަފުންނަށް އެމްޓީސީސީ އިން މަރުހަބާ ކިޔައިފިއެވެ.
ދިވެހި ދައުލަތަށް 35 އަހަރަށް ވުރެ ދިގު މުއްދަތަކަށް ހިދުމަތް ކުރައްވައިފައި ވާ ބޭފުޅުންގެ ތެރެއިން މަގާމުގެ މަސްއޫލިއްޔަތު އަދާކުރެއްވުމުގައި ގާބިލުކަމާއި، އިހްލާސްތެރިކަމާއެކު ކުރައްވައިފައިވާ ހިދުމަތްތަކަށާއި، އެ ބޭފުޅަކު ވަޒީފާ އަދާކުރެއްވި މުއައްސަސާގެ ކުރިއެރުމަށް ކުރައްވައިފައިވާ ހިދުމަތްތަކުގެ އަގު ވަޒަންކުރެއްވުމުގެ ގޮތުން ގައުމީ ފެންވަރުގައި، ދިވެހި ދައުލަތުން ރައީސުލްޖުމްހޫރިއްޔާ ދެއްވަން ފެށްޓެވި ޝަރަފުވެރި އިނާމު ކާމިޔާބު ކުރި މުވައްޒަފުންނަށް އެކުންފުނިން ވަނީ މަރުހަބާ ކިޔާފައެވެ.
އެމްޓީސީސީއިން ޝަރަފުގެ އިނާމު ހާސިލުކޮށްފައިވަނީ ހަސަން ހަލީލް، މުހައްމަދު ޝަމީމް، އަބްދުއް ލަތީފު އަހްމަދު، އަހުމަދު ސާޖިދު އަދި މުހައްމަދު ފަތުހީއެވެ.
- ހަސަން ހަލީލް
ހަސަން ހަލީލް އެމްޓީސީސީ އާއި ގުޅިފައިވަނީ 1983 ވަނަ އަހަރުގައެވެ. މި އެވޯޑާއި ގުޅިގެން އެމްޓީސީސީގެ ވެރިންނާއި، މުވައްޒަފުން އަދި ހިއްސާދާރުންނަށް ޝުކުރު އަދާކޮށް ހަސަން ހަލީލް ވަނީ ކުންފުނީގެ މުވައްޒަފުންނަށް ވަޒީފާއަށް ފަރުވާތެރިވެ، ގަޑިއަށް ހާޒިރުވުމަށް ނަސޭހަތްތެރިވެފައެވެ. އަދި މިއީ ކުންފުނީގައި ގިނަ ދުވަހު މަސައްކަތްކުރުމަށް ލިބޭ ހިތްވަރެއްގެ ގޮތުގައި ހަސަން ހަލީލް ފާހަގަކުރެއްވިއެވެ.
- މުހައްމަދު ޝަމީމް
އެމްޓީސީސީ އާއި 1984 ވަނަ އަހަރު ގުޅުނު މުހައްމަދު ޝަމީމް ވަނީ އެމްޓީސީސީގައި ގިނަ ދުވަހު މަސައްކަތް ކުރެވުނީ ހުރިހާ ވެރިންނާއި، މުވައްޒަފުންގެ ވަރަށް ބޮޑު އެއްބާރުލުމާ އެހީތެރިކަމާއެކުކަން ފާހަގަކޮށްފައެވެ.
- އަބްދުއް ލަތީފް
އަބްދުއް ލަތީފް އަހްމަދު ވަނީ 1980 ވަނަ އަހަރުން ފެށިގެން 2022 ވަނަ އަހަރާ ހަމައަށް އެމްޓީސީސީގައި މަސައްކަތްކޮށްފައެވެ. އެމްޓީސީސީ ޓީމްގެ ފަރާތުން ލިބުނު އެއްބާރުލުން ފާހަގަކޮށް އަބްދުއް ލަތީފް އަހްމަދު ވިދާޅުވީ ކުންފުނިން އޭނާގެ މަސައްކަތުގެ އަގު ވަޒަންކޮށްފައިވާކަމަށެވެ. އަދި މި އެވޯޑު ލިބުމަކީ ލިބުނު ވަރަށް ބޮޑު އުފަލެއްކަމުގައި އަބްދު ލަތީފް އަހްމަދު ވިދާޅުވިއެވެ.
- އަހްމަދު ސާޖިދު
އަހްމަދު ސާޖިދު އެމްޓީސީސީ އާއި ގުޅުނީ 1985 ވަނަ އަހަރުގައެވެ. އަހްމަދު ސާޖިދު ވިދާޅުވީ އެމްޓީސީސީގައި 39 އަހަރު ކުރި ހިދުމަތް ސަރުކާރުންނާއި އެމްޓީސީސީއިން ފާހަގަކުރުމުން ޝުކުރުއަދާކޮށްފައެވެ. އަދި އެމްޓީސީސީގައި އެކި ދުވަސްވަރު މަސައްކަތްކުރެއްވި ވެރިންގެ ފަރާތުން ލިބުނު އެހީތެރިކަމަށް ޝުކުރުއަދާ ކުރާ ކަމަށެވެ.
- މޫސާ ފަތުހީ
މޫސާ ފަތުހީ އެމްޓީސީސީ އާއި ގުޅުނީ 1986 ވަނަ އަހަރުގައެވެ. އޭނާ ވަނީ އެމްޓީސީސީގައި މިހާ ގިނަ ދުވަހު މަސައްކަތްކުރެވުނީ ގިނަ ފަރާތްތަކުގެ އެހީތެރިކަމާއެކު ކަން ފާހަގަކޮށްފައެވެ.
