ބާރު ސްޕީޑްގައި ދުއްވާފައި ދިޔަ ރޭސް ކާރަކާއި ސައިކަލެއް ޖެހި ހިނގި އެކްސިޑެންޓުގައި ޕްރިޒަންސް ލާންސްކޯޕްރަލް ހަސަން ސަމާހް މަރުވި މައްސަލައިގައި ދައުވާ ކޮށްފިއެވެ.
ސެޕްޓެމްބަރު މަހުގެ 6 ވަނަ ދުވަހުގެ ރޭ ދަންވަރު ހިނގި މި ހިތާމަވެރި ހާދިސާގައި ކާރު ދުއްވަން އިނީ، އައްޑޫ/ހިތަދޫ، ވައިލެޓްފެހިގެ މުހައްމަދު ވިސާމު ސިދުގީ އެވެ. އެ އެކްސިޑެންޓުގައި އަނިޔާވި އުމުރުން 23 އަހަރުގެ ސަމާހު މަރުވީ އެކްސިޑެންޓުގައި ލިބުނު އަނިޔާތަކަށް ފަރުވާ ދެމުން ދަނިކޮށް ހަމަ އެދުވަހުގެ ވަގުތެއްގައެވެ.
އެ މައްސަލައާއި ގުޅިގެން ޕްރޮސިކިއުޓާ ޖެނެރަލް އޮފީހުން މިއަދު ބުނީ ވިސާމްގެ މައްޗަށް ދައުވާ ކޮށްފައި ވަނީ މިދިޔަ މަހުހެ 31 ވަނަ ދުވަހު ކަމަށެވެ. އެ މައްސަލައިގައި ޕީޖީން ވިސާމުގެ މައްޗަށް ކޮށްފައިވަނީ ގާނޫނުލް އުގޫބާތުގެ 111 ވަނަ މާއްދާގެ (ހ) އާ ހަވާލާދީ، އެ މާއްދާގެ (ނ) ގެ ދަށުން، މީހަކު މަރުވެދިއުމުގެ ފަރުވާކުޑަ އަމަލެއް ކުރުމުގެ ކުށުގެ ދައުވާ އެވެ.
އެ ދައުވާގައި ބުނެފައި ވަނީ ކާރު ދުއްވުމުގެ ލައިސަންސް ނެތި، ހުޅުމާލެ ސެންޓްރަލް ޕާކު ކައިރިން އިރުން ހުޅަނގަށް ކާރުގައި ހުއްދަކުރެވިފައިވާ ސްޕީޑަށް ވުރެ ބާރަށް ދުއްވާފައި ދިޔަ ކަމަށާއި ހުޅުމާލެ ރީތި ގަސްމަގުން ދެކުނުން އުތުރަށް ދުއްވާފައި އައިސް ބަގީޗާހިނގުމަށް ނިކުތް ސައިކަލުގައި، ކޮންޓްރޯލުނުވެގެންގޮސް ޖެހި އެކްސިޑެންޓްވެފައިވާ ކަމަށެވެ.
އެ ދައުވާ ސާބިތުވެއްޖެ ނަމަ އޭނާގެ މައްޗަށް ކަނޑައެޅޭނެ އަދަބަކީ ހަ އަހަރަށް ޖަލަށް ލުން ކަމަށް ވެސް ބުނެފައި ވެއެވެ. ވިސާމް މިހާރު ހުރީ ޝަރީއަތް ނިމެންދެން ބަންދުކޮށްފަ އެވެ.
