ސިޔާސީ ޕާޓީއަކަށް ނިސްބަތްވާ މެންބަރަކު ގާނޫނާ ހިލާފުކަމެއް ކޮށްފި ނަމަ އެ އަމަލެއް ހިންގި މެންބަރަކު ނިސްބަތްވާ ޕާޓީއެއް އެއްލައްކަ ރުފިޔާއިން ޖޫރިމަނާކުރަން ސަރުކާރުން ހުށަހެޅި އިސްލާހު މަޖިލީހުން ފާސްކޮށްފިއެވެ.
މިދިޔަ މަހުގެ ފަހުކޮޅު ސަރުކާރުގެ ފަރާތުން ހުށަހެޅި މައިގަނޑު އިސްލާހަކީ އިލެކްޝަންސް ކޮމިޝަނުން ސިޔާސީ ޕާޓީތައް ޖޫރިމަނާކުރެވޭ ގޮތަށް އޮންނަ އޮތުމުގެ ތެރެއަށް، ޕާޓީއަކަށް ނިސްބަތްވާ މެންބަރަކު ގާނޫނާ ހިލާފު އަމަލެއް ކޮށްފިނަމަ އެއްލައްކަ ރުފިޔާއިން އެ މެންބަރަކު ނިސްބަތްވާ ޕާޓީއެއް ޖޫރިމަނާކުރެވޭ ގޮތް ހެދުން އިތުރުކުރުމަށެވެ.
މިހާރު ވެސް އިލެކްޝަންސް ކޮމިޝަނުން ސިޔާސީ ޕާޓީތައް ޖޫރިމަނާކުރެއެވެ. އެއީ:
- ޕާޓީއެއްގެ މެންބަރުކަމަށް ގަވައިދާ ހިލާފަށް މީހެއްގެ ނަން ހުށަހެޅުން: 5،000 ރުފިޔާ އާއި 10 ހާސް ރުފިޔާގެ އަދަދެއްގެ ޖޫރިމަނާއެއް
- އެހެނިހެން މާއްދާތަކާ ހިލާފުވާ މެންބަރުން: 30 ހާސް ރުފިޔާ އާއި 75 ހާސް ރުފިޔާ އާ ދެމެދުގެ އަދަދެއްގެ ޖޫރިމަނާއެއް
މި އިސްލާހު ދިރާސާކުރުމަށް ބޭއްވި ކޮމިޓީ ބައްދަލުވުމުގައި ވަނީ، ސިޔާސީ ޕާޓީއެއް އުވާލި ނަމަވެސް އެ ޕާޓީއެއްގެ ނަމާއި ނިޝާން ފަދަ ޕާޓީ ރަމްޒުކޮށްދޭ ފަދަ ތަކެތި ޕާޓީ އުވާލާތާ ފަސް އަހަރު ނުވާ ނަމަ ބޭނުންނުކުރެވޭ ގޮތް ހެދުމަށާއި، ފަސް އަހަރުން އެއް ފަހަރު ޕާޓީތަކުން ގައުމީ ބައްދަލުވުމެއް ނުބޭއްވިޔަސް އެ ޕާޓީއެއް ނުވަތަ ޕާޓީތައް އުވާނުލެވޭ ގޮތް ހެދުމަށެވެ.
މި އިސްލާހު ފާސްކުރުމަށް ފެނޭތޯ ވޯޓަށް އެހުމުން، ވޯޓުގައި ބައިވެރިވި 71 މެންބަރުންގެ ތެރެއިން 61 މެންބަރަކު ވޯޓުދެއްވީ އިސްލާހު ފާސްކުރަން ފެންނަ ކަމަށެވެ. ނުފެންނަ ކަމަށް 10 މެންބަރަކު ވޯޓު ދެއްވިއެވެ.
