ދައުލަތުގެ މަގާމަކުން ވަކިވާ ފަހުން ވެސް އެފަދަ މަގާމެއްގައި ހުރެ ހޯދި ނުހައްގު މުއްސަނދިކަމަށް ފަސޭހައިން ދައުވާކުރެވޭނެ ފަދަ ގޮތަކަށް ގާނޫނުލްއުގޫބާތު އިސްލާހުކުރަން ރައްޔިތުންގެ މަޖިލީހަށް ހުށަހެޅި އިސްލާހު ބަލައިގެންފިއެވެ.
ސަރުކާރުގެ ފަރާތުން ހުށަހެޅި މި އިސްލާހު މަޖިލީހުން ބަލައިގަތުމަށް ނެގި ވޯޓުގައި ބައިވެރިވި 70 މެންބަރުން ވެސް ވޯޓުދެއްވީ އިސްލާހު ބަލައިގަތުމަށް ފެންނަ ކަމަށެވެ.
އެހެންވެ ރިޔާސަތުން ވަނީ މި އިސްލާހު އިތުރަށް ދިރާސާކުރުމަށްޓަކައި ޖުޑީޝަރީ ކޮމިޓީއަށް ފޮނުވައިފައެވެ.
ސަރުކާރުގެ ފަރާތުން ގާނޫނުލްއުގޫބާތަށް ހުށަހެޅި މި އިސްލާހުގެ ބޭނުމަކީ ނުހައްގު މުއްސަނދިކަން ހޯދައި ލިބިގަތުމުގެ ކުށް ކަނޑައަޅާފައި އޮތްގޮތުން ގާނޫނު މާނަކުރުމުގައި އޮޅުން އަރާތީ ގާނޫނު އިސްލާހުކުރުމަށެވެ.
މި އިސްލާހުގައި މައިގަނޑު ގޮތެއްގައި ހުށަހަޅާފައި ވަނީ ކުދިކުދި ބަދަލުތަކެވެ. މައިގަނޑު އިސްލާހަކީ 'ދައުލަތުގެ މުވައްޒަފެއްގެ ގޮތުގައި ވަޒީފާ އަދާކުރިއިރު' އިތުރުކުރުމަށް ހުށަހެޅި ހުށަހެޅުމެވެ. އަދި ކަނޑައަޅާފައިވާ ކުށްތަކަށް ބަދަލެއް ނުގެނައި ނަމަވެސް، އިސްލާހުގައި ވަނީ ކުށްތައް އިތުރަށް ސާފުވާނެ ހެން ބައެއް ބަސް ބަހަށް ބަދަލު ގެނެސްފައެވެ.
އެކަމަކު މި އިސްލާހަށް ވަނީ، ދައުލަތުގެ މުވައްޒަފެއްގެ ދިރިއުޅުމުގެ ފެންވަރު އޭނާ ގާއިމްކޮށް ހިފަހައްޓާފައި ވަނީ ގާނޫނީގޮތުން ހުއްދަކޮށްފައިވާ ގޮތުގެ މަތިން ކަމަށްވާ ނަމަ، ނުވަތަ އޭނާގެ އާއިލީ ނުވަތަ ޒާތީ ނުވަތަ ވިޔަފާރީގެ ގުޅުމެއް އޮތް މީހަކަށް އެ މުދަލެއް ނުވަތަ ފައިސާ ލިބިފައިވަނީ ގާނޫނު ހުއްދަކުރާ ގޮތުގެ މަތިން ކަމަށްވާ ނަމަ، އެ ކުރަނީ ކުށެއްނޫން ކަން ބަޔާންކޮށް، އަކުރެއް އިތުރުކުރުމަށް ހުށަހަޅައިފައެވެ.
ނުހައްގު މުއްސަނދިކަން ހޯދުން ޖިނާއީ ކުށަކަށް ހަދަން ގާނޫނުލްއުގޫބާތަށް ފުރަތަމަ އިސްލާހެއް ގެނައީ 2021 ވަނަ އަހަރުގައެވެ. އަދި ދައުލަތުގެ އިދާރާތަކުގެ ކޮރަޕްޝަނާއި ނުހައްގު މުއްސަނދިކަން ތަހްގީގުކުރުމަށް ހުރި ގޮންޖެހުންތައް ނައްތާލުމަށްޓަކައި ގާނޫނުލްއުގޫބާތު އިސްލާހުކުރަން ހުށަހަޅުއްވާނެ ކަން ރައީސް ޑރ. މުހައްމަދު މުއިއްޒު އިއުލާނުކުރެއްވިއެވެ.
