މިހާރު ހުށަހެޅިފައިވާ ބަޖެޓަކީ މަޖިލީހުގެ މެންބަރުން ރައީސުލްޖުމްހޫރިއްޔާ އަދި ސަރުކާރުގެ ވެރިންގެ އަރިހުން އާދޭސް ދަންނަވަން ޖެހޭ ގޮތަށް ފަރުމާ ކުރެވިފައިވާ ބަޖެޓެއްކަމަށް ރައްޔިތުުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ބަޖެޓަށް ބަހުސް ކުރައްވަމުން މެންބަރު މައުރޫފް ވިދާޅުވީ، ކުރިއަށް އޮތް ތަނުގައި އެ ނޫން ގޮތަކަށް އެއްވެސް ރަށެއްގައި އެއްވެސް މަޝްރޫޫއެއް ނުހިންގޭނެ ކަމަށާއި ކެންދޫ ދާއިރާގެ ބަޖެޓަށް ބަލާލި ނަމަވެސް ފެންނަން އޮތީ އެ މަންޒަރުކަމަށެވެ.
މިއީ ސިޔާސީ ފިކުރަށް ބަލައިގެން ބަޖެޓުގައި މަޝްރޫއުތައް އެކުލަވާލި ފުރަތަމަ ފަހަރު ކަން ފާހަގަކޮށް މައުރޫފް ވިދާޅުވީ ކެންދީ ދާއިރާއަށް އެ ބަޖެޓުގައި އެއްވެސް ކަމެއް ނެތްކަމަށާއި ރައްޔިތުން ބޭނުންވާ ނަމަ އިސްތިއުފާ ދިނުމަށްވެސް ތައްޔާރަށް ހުންނެވިކަމަށެވެ. "ކެންދޫ ދާއިރާއަށް ބަލާއިރު، އެމްޑީޕީއަށް ނިސްބަތްވާ މެންބަރެއް ހުރުމުން 2025 ގެ ބަޖެޓުގައި އެ ދާއިރާއަށް އެއްވެސް ކަމެއް ހިމެނިފައިނުވޭ" މައުރޫފު ވިދާޅުވިއެވެ.
އިތުރަށް މައުރޫފު ވަނީ ތަފާތު ކުރުން ހުއްޓާލައި، ދާއިރާގެ ރަށްތަކަށް ދިމާވެފައިވާ ބޮޑެތި މައްސަލަތައް އައްލު ކޮށްދިނުމަށް ސަރުކާރަށް ގޮވާލައްވާފައެވެ.
މީގެ އިތުރުން މައުރޫފު ވިދާޅުވީ މިއީ ޓެކްްސް ބޮޑު، ހަރަދު ބޮޑު ދަރަނީގެ ބަޖެޓެއް ކަމަށެވެ. އަދި 2024 ވަނަ އަހަރުވެސް މާލީ ކަންކަން ސަރުކާރުން މެނޭޖުކޮށްފައިވަނީ ގޯސްކޮށް ކަން ފާހަގަކޮށް އޭނާ ވިދާޅުވީ އަންނަ އަހަރަށްވެސް ސަރުކާރުގެ މިސްރާބު ހުރީ ހަމަ އެގޮތަށްކަމަށެވެ،
