އަންނަ އަހަރަށް ލަފާކޮށްފައިވާ ބަޖެޓުގައި 695 މަޝްރޫއަކަށް 12.3 ބިލިޔަން ރުފިޔާ ކަނޑައަޅައިފިއެވެ.
ޕަބްލިކް ސެކްޓާ އިންވެސްޓްމަންޓް ޕްރޮގްރާމު (ޕީއެސްއައިޕީ) ގެ ދަށުން އަންނަ އަހަރު ކުރިއަށް ގެންދިޔުމަށް ހަމަޖެހިފައިވާ ި މަޝްރޫތަކުގެ ތެރޭގައި މިހާރު ހިނގަމުންދާ 396 މަޝްރޫއަކަށް 7.6 ބިލިޔަން ރުފިޔާ ވަނީ ކަނޑައަޅާފައެވެ. އަދި މީގެ ކުރިން ބަޖެޓުގައި ހިމަނާފައި އޮތްނަމަވެސް އަމަލީ މަސައްކަތްތައް ފަށާފައިވާނުވާ 62 މަޝްރޫއަކަށްވެސް 1.6 ބިލިޔަން ރުފިޔާ އަންނަ އަހަރުގެ ބަޖެޓުގައި ވަނީ ހިމަނާފައެވެ.
ސަރުކާރުން ވަނީ ޕީއެސްއައިޕީގެ ހަރަދުތައް ބައްޓަންކުރަނީ ސަރުކާރުގެ މެނިފެސްޓޯގައިވާ ތަރައްގީގެ މުހިންމު މަޝްރޫތަކަށް ޖާގަދިނުމަށް ކަމަށް ބުނެފައެވެ. އެގޮތުން ބޯހިޔާވަހިކަމުގެ މަޝްރޫތަކަށް މުޅި ޕީއެސްއައިޕީ ބަޖެޓުގެ ޖުމުލަ 14.6 އިންސައްތަ ވަނީ ހިމަނާފައެވެ.
ފާހަގަކޮށްލެވޭ ގޮތުގައި ބަޖެޓުގައި ދެން އެންމެ ގިނަ އަދަދެއް ހިމަނާފައިވަނީ ސިއްހީ އަދި ތައުލީމީ ދާއިރާގެ މަޝްރޫތައް ކުރިއަށް ގެންދިޔުމަށެވެ. އެގޮތުން ތައުލީމީ ދާއިރާގެ މަޝްރޫތައް ކުރިއަށް ގެންދިޔުމަށް 6.1 ބިލިޔަން ރުފިޔާ ވަނީ ކަނޑައަޅާފައެވެ އަދި ސިއްހީ ދާއިރާގެ މަޝްރޫތަކަށް 8.2 ބިލިޔަން ރުފިޔާ ވަނީ ކަނޑައަޅާފައެވެ.
މީގެއިތުރުން ތިމާވެށި ރައްކާތެރިކުރުމަށް ކުރިއަށްގެންދާ މަޝްރޫތަކަށް 2.3 ބިލިޔަން ރުފިޔާ ވަނީ ބަޖެޓުގައި ހިމަނާފައެވެ.
