މޫސުމީ ބަދަލުތަކުގެ ސަބަބުން ދިމާވާ ކާރިސާތަކުން ރައްކާތެރިކަން ހޯދުމަށް ފިޔަވަޅު އެޅުމަށާ، ކާބޯތަކެތީގެ ނިޒާމުގެ ދެމެހެއްޓެނިކަން ހޯދުމަށް އޭޝިއަން ޑިވެލޮޕްމަންޓު ބޭންކުން (އޭޑީބީން) ރާއްޖެއަށް 21.95 މިލިއަން ޑޮލަރުގެ ފައިނޭންސިން ޕެކޭޖެއް ހަމަޖައްސައިފިއެވެ.
އޭޑީބީން ބުނީ މި ޕެކޭޖްގެ ދަށުން 4 މިލިޔަން ޑޮލަރު ދެނީ ލޯނެއްގެ ގޮތަށް ކަމަށެވެ. އަދި ބާކީ 17.95 މިލިއަން ޑޮލަރަކީ އޭޝިއަން ޑިވެލޮޕްމަންޓް ފަންޑުގެ ދަށުން ދޭ ގްރާންޓެއްކަމަށްވެސް އޭޑީބީ އިން ވަނީ ބުނެފައެވެ.
އޭޑީބީން ބުނީ މި އެހީގެ ދަށުން ރާއްޖޭގައި މޫސުމީ ބަދަލުތަކުގެ ސަބަބުން ދިމާވާ ކާރިސާތަކުން ރައްކާތެރިވުމަށް އެޅޭ ފިޔަވަޅުތައް ވަރުގަދަކުރުމަށާއި ކާބޯތަކެތީގެ ނިޒާމުގެ ދެހެމެއްޓެނެވިކަން ހޯދުމަށް މުހިންމު މަސައްކަތްތަކެއް ކުރެވިގެންދާނެކަމަށެވެ. އެގޮތުން މޫސުމާ ބެހޭ ގާއުމީ އިދާރާގައި މިހާރު ހުރި ވަސީލަތްތައް ޒަމާނީ ފެންވަރަށް އަޕްގްރޭޑް ކުރުމާއި، މާލެ އާއި އައްޑޫސިޓީގައި އާލީ ވާނިން ސިސްޓަމެއް ގާއިމުކުރުންވެސް ހިމެނިގެން ދާނެއެވެ.
މީގެ އިތުރުން ރާއްޖޭގެ އުތުރުން ކުޅުދުއްފުށި ސިޓީގައި ފެން ބޮޑުވުން ހައްލުކުރަން ސްޓޯމް ވޯޓަ ޑްރެނޭޖް ސިސްޓަމެއް ގާއިމުކުރުމާއި ކުޅުދުށްފުށީގެ ކަނޑޫފާ ސަރަހައްދު އަލުން އާލާކޮށް، ގުދުރަތީ ވެށި ހިމާޔަތްކުރުމަށްވެސް ހަމަޖެހިފައިވާކަމަށް އޭޑީބީން ވަނީ ބުނެފައެވެ. މި އެހީ މެދުވެރިކޮށް ކާބޯތަކެތީގެ ނިޒާމުގެ ދެމެހެއްޓެނިކަން ހޯދުމަށް ކްލައިމެޓް ސްމާޓް އާބަން ޕާމިންގެ ވަސީލަތްތައް ރާއްޖެއަށް ތައާރަފްކޮށް އެ ވަސީލަތްތައް ބޭނުންކުރާނެގޮތް ހއ. އަތޮޅާއި އައްޑޫ ސިޓީގެ ރައްޔިތުންނަށް ދަސްކޮށްދެވިގެންދާނެއެވެ. އަދި ހދ. ހަނިމާދޫ އެގްރިކަލްޗާ ސެންޓަރުގައި ދިރާސާ ކުރެވޭނެ މަލްޓިޕާޕަސް ފެލިޓީއެއް ގާއިމުކުރުމަށްވެސް ހަމަޖެހިފައިވާކަމަށް އޭޑީބީން ވަނީ ބުނެފައެވެ.
މޫސުމީ ބަދަލުތަކުން ލިބޭ ގެއްލުންތަކުން އަރައިގަތުމަށާއި ކާބޯތަކެތީގެ ރައްކާތެރިކަން ކަށަވަރުކުރުމަށް ރާއްޖޭން ކުރާ މަސައްކަތްތަކަށް އެހީވުމަށް 21.95 މިލިއަން ޑޮލަރު ދޭން އޭޑީބީން ނިންމާފައިވާއިރު، ރާއްޖޭގެ އިޖްތިމާއީ، އިގްތިސާދީ އަދި ޢުމްރާނީ ތަރައްގީގައި އެ ބޭންކަކީ މުހިންމު ދައުރެއް އަދާކުރާ ބޭންކެކެވެ.
