ރާއްޖޭގެ މައި ވައިގެ ބަނދަރު، ވެލާނާ އިންޓަނޭޝަނަލް އެއާޕޯޓުގެ އިންޓަނޭޝަނަލް ޓާމިނަލްގެ މަސައްކަތްތައް ތާވަލާ އެއްގޮތަށް ނިންމޭނެ ކަމުގެ ޔަގީންކަން ދީފިއެވެ.
ސައުދީ ފަންޑުން މި ޔަގީންކަން ދީފައިވަނީ ޖޮއިންޓް އަރަބް އިސްލާމިކް ސަމިޓުގައި ބައިވެރިވެވަޑައިގަތުމަށް ސައުދީ އަރަބިއްޔާގެ ވެރިރަށް ރިޔާޟަށް ރައީސް ޑރ. މުހައްމަދު މުއިއްޒު ކުރެއްވި ދަތުރުފުޅުގައި، އެ ސަމިޓުގެ ހަވާސާގެ ތެރެއިން ސައުދީ ފަންޑުގެ ސީއީއޯ އަބްދުއްރަހްމާން އަލް-މަރްޝަދު އާ ކުރެއްވި ބައްދަލުވުމުގެ ތެރެއިންނެވެ.
ރައީސް އޮފީހުން ބުނީ، މި ބައްދަލުކުރެއްވުމުގައި ސައުދީ ފަންޑުގެ އެހީގައި ރާއްޖޭގައި ކުރިއަށް ގެންދާ މަޝްރޫއުތައް އިތުރަށް ފުޅާކުރުމާ ގުޅޭގޮތުން ވާހަކަ ދެކެވުނު ކަމަށެވެ.
މީގެ އިތުރުން މިހާރު ކުރިއަށްދާ ބައެއް މަޝްރޫއުތައް ކަމަށްވާ ވެލާނާ އެއާޕޯޓުގެ އާ އިންޓަނޭޝަނަލް ޓާމިނަލް އިމާރާތްކުރުމުގެ މަސައްކަތާއި، މަސްވެރިކަމާއި އުމްރާނީ އެކި މަޝްރޫއުތަކުގެ މަސައްކަތްތައް މުއްދަތަށް ނިންމުމަށް ކުރަން ޖެހޭ ކަންކަން ކުރައްވާނެ ކަމުގެ ޔަގީންކަން ރައީސް ވެސް އަދި ސައުދީ ފަންޑުގެ ސީއީއޯ ދެއްވި ކަމަށް ވެސް، ރައީސް އޮފީހުން ބުންޏެވެ.
ވެރިކަމުގެ ކުރީކޮޅު ބޭއްވި ނޫސްވެރިންގެ ބައްދަލުވުމެއްގައި ސަރުކާރުން އޭރު ބުނީ، މިހާރު އޮތް ގޮތުން ނަމަ އާ ޓާމިނަލްގެ މަސައްކަތްތައް އަންނަ އަހަރުގެ މެދުތެރެއިން ފުރިހަމަކުރެވިގެން ދާނެ ކަމަށެވެ. ނަމަވެސް ރައީސްގެ އަމާޒަކީ އާ ޓާމިނަލްގެ މަސައްކަތްތައް މިދިޔަ ސެޕްޓެމްބަރު މަހުގެ ނިޔަލަށް އަވަސްކޮށް، މި އަހަރުގެ ޕީކް ސީޒަނަށް އެ ތަން ބޭނުންކުރެވޭ ހާލަތަކަށް ގެންދިއުން ކަމަށް، ރައީސް އޮފީހުގެ ފަރާތުން އޭރު ބުނެފައިވެއެވެ.
ވެލާނާ އެއާޕޯޓުގެ ޓާމިނަލް ތަރައްގީކުރުމަށްޓަކައި އެންމެ ބޮޑު އެހީތެރިކަމެއް ފޯރުކޮށްދިނީ ސައުދީ ފަންޑުންނެވެ. އެ މަޝްރޫއުގެ މައި ކޮންޓްރެކްޓަރަކީ ސައުދީގެ ސައުދީ ބިން ލާދިން ގްރޫޕެވެ. އެކަމަކު އަމަލީ މަސައްކަތްތައް ކުރަނީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕުންނެވެ.
