ރައްޔިތުންގެ މަޖިލީހުގެ މެންބަރުން މަގާމުން ވަކިކުރެވޭ ގޮތް ގާނޫނުގައި އޮންނަން ޖެހޭ ކަމަށް ގަބޫލުކުރައްވާ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ޖުމްހޫރީ ދުވަހާ ގުޅިގެން ޕީއެސްއެމްއިން ގެނެސްދިން ޕްރޮގްރާމެއްގައި ވާހަކަ ދައްކަވަމުން އަބްދުއްރަހީމް ވަނީ ރައީސުލްޖުމްހޫރިއްޔާއަކީ ގައުމުގެ މުޅި ރައްޔިތުންގެ ވޯޓުން އިންތިހާބުކުރާ ބޭފުޅެއްކަން ފާހަގަކުރައްވާފައެވެ.
އަބްދުއްރަހީމް ވިދާޅުވީ ގައުމުގެ ވޯޓުލުމުގެ ހައްގު ލިބިގެންވާ ހުރިހާ ރައްޔިތުން ބައިވެރިވާ އިންތިހާބަކުން ރައީސް އިންތިހާބު ކުރާއިރު ރައީސް ވަކިކުރުމުގެ ހައްގު ގާނޫނު އަސާސީއިން ރައްޔިތުންގެ މަޖިލީހަށް ފަހިކޮށްދީފައިވާ ކަމަށެވެ. އެއާ ހިލާފަށް ރައްޔިތުންގެ މަޖިލީހުގެ މެންބަރުންނަކީ 5،000 މީހުން ވޯޓުލައިގެން އިންތިހާބު ކުރާ މެންބަރުން ކަމުގައި ވާއިރު، އެ މެންބަރުން ވަކިކުރެވޭނެ ބާރު ގާނޫނު އަސާސީއިން ދީފައިނުވާކަން އަބްދުއްރަހީމް ފާހަގަ ކުރެއްވިއެވެ.
ގައުމުގެ އެންމެ މަތީ ވެރިމީހާ ބަދަލުކުރުމުގެ ފުރުސަތު ފަހިވެފަ އޮވެފައި، މަޖިލިސް މެންބަރުން ވަކިކުރުމުގެ ފުރުސަތު ފަހިވެފައި ނެތުމަކީ މި ޒަމާނާ ފައިހަމަވާ ކަމެއް ނޫން ކަމަށް އަބްދުއްރަހީމް ވިދާޅުވިއެވެ. އަބްދުއްރަހީމް ވިދާޅުވީ މަޖިލީހުގެ މެންބަރުން ވަކި ކުރެވޭނެ ގޮތް ގާނޫނުގައި އޮންނަންވާނެ ކަމަށް ގަބޫލުކުރައްވާ ކަމުގައެވެ.
މިސާލެއްގެ ގޮތުން އަބްދުއްރަހީމް ވިދާޅުވީ އެމަނިކުފާނު އިންތިހާބު ކުރީ ފޮނަދޫ ދާއިރާގެ ރައްޔިތުން ކަަމަށް ވާއިރު، އެ ރައްޔިތުންގެ ވިންދާ ދެކޮޅަށް ނުވަތަ ރައްޔިތުން އިންތިހާބު ކުރި ފިކުރާ ދެކޮޅަށް މަސައްކަތް ކުރާނަމަ ނުވަތަ އެނޫން ވެސް ސަބަބެއް މެދުވެރިވެއްޖެނަމަ އެ މެންބަރެއް ވަކިކުރުމުގެ ބާރު ރައްޔިތުންނަށް އޮންނަންވާނެ ކަމަށް ގަބޫލުކުރައްވާ ކަމަށެވެ.
އަބްދުއްރަހީމް އިތުރަށް ވިދާޅުވީ އެފަދަ މެންބަރަކު މަގާމަކުން ދުރު ކުރެވޭނެ ގޮތެއް ގާނޫނުގެ ތެރެއިން ފަހިވެފައި އޮންނަން ޖެހޭނެ ކަމަށް އަބަދުވެސް ގަބޫލު ކުރައްވާ ކަމަށެވެ.
