އަންނަ އަހަރުގެ ބަޖެޓުގައި ދެވަނައަށް އެންމެ ބޮޑު އިސްކަމެއް ދޭނީ ތައުލީމާއި ސިއްހަތަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ރޭ ދަރުބާރުގޭގައި ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ގައުމާ މުހާތަބުކުރައްވާ ވާހަކަފުޅު ދައްކަވަމުންނެވެ.
ވޭތުވެ ދިޔަ އަހަރު ދުވަހުގެ ތެރޭގައި މަތީ ތައުލީމުގެ ދާއިރާއިން ގިނަ މަސައްކަތްތަކެއް ކޮށްފައިވާކަން ރައީސްގެ ވާހަކަފުޅުގައި ފާހަގަކުރެއްވިއެވެ. އެގޮތުން ގިނަ އަދަދެއްގެ ތަމްރީނު ޕްރޮގްރާމްތަކާއި ސްކިލްސް ޑިވެލޮޕްމަންޓް މަޝްރޫއުތައް ހިންގައި އަދި ގިނަ އަދަދެއްގެ ސްކޮލާޝިޕްތަކުގެ އިތުރުން ލޯން ސްކީމްގެ ތެރެއިން ގިނަ އަދަދަކަށް ލޯނު ދޫކޮށްފައިވާކަން ރައީސް ވަނީ ފާހަގަ ކުރައްވާފައެވެ.
ރައީސް ވިދާޅުވީ މަތީ ސާނަވީ ދަރިވަރުންނަށް ފުރުސަތުތައް ފަހިކުރުމުގެ ގޮތުން 23 ސްކޫލެއްގައި މަތީ ސާނަވީ ކިޔަވައިދޭން ފަށާފައިވާ ކަމަށެވެ. މާލޭގައި ގްރޭޑް 11 އަދި 12 ކިޔަވާ ކުދިންގެ ލުއި ފަސޭހައަށްޓަކައި ސީއެޗްއެސްއީ މާލެ، އަލުން ހުޅުވާފައިވާ ކަމަށާއި އަރަބިއްޔާ ސްކޫލަށް ބޮޑު ބިމެއް ކަނޑައަޅައި، ވަރަށް އަވަހަށް އެ ސްކޫލް އިމާރާތްކުރުމުގެ އަމަލީ މަސައްކަތް ފެށޭނެ ކަމަށް ވެސް ރައީސް ވިދާޅުވިއެވެ.
ދިވެހި ދަރިވަރުންނަށް ކިޔަވައިދޭނެ ދިވެހި މުދައްރިސުން އުފެއްދުމުގެ މުހިންމުކަމުގެ މައްޗަށް އަލިއަޅުއްވާލައި ރަައީސް ވިދާޅުވީ ދިވެހި ތުއްތުކުދިންނަށް ކިޔަވައިދިނުން ދިވެހިންގެ އަތްމައްޗަށް ގެނައުމަކީ ސަރުކާރުން އިސްކަންދޭ ކަމެއް ކަމަށެވެ. އަދި އޭލެވަލް ހަދަމުންދާ ކުދިންނަށް ވެސް ޓީޗިން ދާއިރާއަށް ވަންނަން ފުރުސަތު ދެމުން ދަނީ އެ އުއްމީދުގައި ކަމަށް އެމަނިކުފާނު ވިދާޅުވިއެވެ.
ރައީސް އިތުރަށް ވިދާޅުވީ މި އަހަރު ވެގެންދާނީ ރާއްޖޭގައި އެންމެ ގިނަ އަދަދަކަށް މުދައްރިސުން ތަމްރީނުކުރެވޭ އަހަރަށް ކަމަށެވެ.
