މި ސަރުކާރަކީ ދެފުށް ފެންނަ ރައްޔިތުންނަށް ޖަވާބުދާރީވާ އަދި ރައްޔިތުން އެދޭ އަމާޒަށް ވެރިކަންކުރާނެ ސަރުކާރެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރޭ ޖުމްހޫރީ ދުވަހާ ގުޅިގެން ބޭއްވި ރަސްމީ ޖަލްސާގައި ވާހަކަފުޅުދައްކަވަމުން ރައީސް މުއިއްޒު ވިދާޅުވީ ރައްޔިތުންނަށް މައުލޫމާތު ފޯރުކޮށްދީ، ދެފުށް ފެންނަ ސަރުކާރެއް ގޮތުގައި މަސައްކަތް ކުރުމަށް އުފައްދާފައިވާ "ރައްޔިތުންގެ އަޑު" ޕޯޓަލްގެ ތެރެއިން މިހާތަނަށް ގާތްގަނޑަކަށް 840 އަށް ވުރެ ގިނަ ސުވާލު އެމަނިކުފާނަށް ލިބިވަޑައިގެންފައިވާކަމަށެވެ. އަދި މީގެތެރެއިން މިހާތަނަށް ޖަވާބު ނުދެއްވެވި އޮތީ އެންމެ 22 ސުވާލަށް ކަމަށް ރައީސް ވަނީ ވިދާޅުވެފައެވެ.
މީގެއިތުރުން ރައީސް ވިދާޅުވީ އެމަނިކުފާނަށް މިހާތަނަށް ލިބިވަޑައިގެންނެވި އާރުޓީއައި ތަކުގެތެރެއިން 90 އިންސައްތައަށް ޖަވާބުދާރީ ވެވަޑައިގެންފައި ވާކަމަށެވެ. އަދި މިފަހުން އައި އެއްވެސް ސަރުކާރަކުން ނުބާއްވާވަރަށް ނޫސްވެރިންގެ ބައްދަލުވުން ސަރުކާރުގެ ފަރާތުން ބާއްވާފައިވާ ކަމަށްވެސް ރައީސް ވަނީ ވިދާޅުވެފައެވެ.
މީގެއިތުރުން ރައީސް ރޭގެ ޖަލްސާގައި ވަނީ މުހިންމު މައްސަލަތައް ހައްލު ކުރަން ސަރުކާރުން މަސައްކަތް ފަށާފައިވާ ކަމަށާއި ސަރުކާރުން މިހާތަނަށް ކޮށްފައިވާ މުހިންމު ކަންކަމުގެ މައްޗަށް ވެސް އަލިއަޅުއްވާލާފައެވެ. އެގޮތުން ޑޮލަރުގެ ކަޅު ބާޒާރު ވަކި ބައެއްގެ އަތްމަތީގައި އޮތް އޮތުން ނިމުމަކަށް މިހާރު ގެނެސްފައިވާނެ ކަމަށް ރައީސް ވަނީ ވިދާޅުވެފައެވެ.
އަދި ފަލަސްތީނުގެ ރައްޔިތުންގެ ހައްގުގައިވެސް އެންމެ ކެރިގެން ވަކާލާތުކުރާ އެއް ގައުމަކަށް ރާއްޖެ ވާ ކަންވެސް ރައީސް ވަނީ ފާހަގަކުރައްވާފައެވެ. މީގެއިތުރުން މި އަހަރު ނިމުމުގެ ކުރިން 2 މިލިއަން ފަތުރުވެރިން ރާއްޖެ ގެނައުމުގެ އަމާޒަށްވެސް އަންނަ މަހު ވާސިލުވެވޭނެކަމަށް ވިދާޅުވެ ރައީސް ވަނީ މި އަހަރު އެކަނި 1984 ޓޫރިސްޓު ބެޑް އިތުރުކުރެވިއްޖެ ކަމަށް ވިދާޅުވެފައެވެ.
