ވެރިކަމަކީ ވަރުގަދަ ޒިންމާއެއް، މަސްއޫލިއްޔަތެއް އަދި ބޮޑު އަމާނާތެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައިވަނީ ޖުމްހޫރީ ދުވަހުގެ މުނާސަބަތުގައި މިރޭ ދަރުބާރުގޭގައި ބޭއްވި ރަސްމީ ޖަލްސާގައި ވާހަކަފުޅުދައްކަވަމުންނެވެ. އެގޮތުން ރައީސް ވިދާޅުވީ ވެރިކަމަކީ ވެރިކަން ކުރާ މީހާއަށް ލިބޭ މޮޅެއް ނުވަތަ މުދާގަނޑެއް ނޫން ކަމަށާއި، ވެރިކަމަކީ ވަރުގަދަ ޒިންމާއެއް ކަމަށެވެ.
މިރޭގެ ޖަލްސާގައި ރައީސް ވިދާޅުވީ "ދައުލަތާއި ވެރިންނާއި މަސްއޫލިއްޔަތު އަދި ކިޔަމަންވުމުގެ މަފްހޫމް" ނަމަކަށް ކިޔުނު ފޮތަކީ އެމަނިކުފާނުގެ "ގައިޑްބުކް" ކަމަށާއި އެއީ ރައީސް މުއިއްޒުގެ ބައްޕާފުޅު ލިޔުއްވި ފޮތެއް ކަމަށެވެ. މިރޭގެ ޖަލްސާގައި ރައީސް ވަނީ ފޮތުން ބައެއް ބައިތައް ވިދާޅުވެފައެވެ.
މީގެއިތުރުން ރައީސް ވަނީ މުހިންމު މައްސަލަތައް ހައްލު ކުރަން ސަރުކާރުން މަސައްކަތް ފަށާފައިވާ ކަމަށާއި ސަރުކާރުން މިހާތަނަށް ކޮށްފައިވާ މުހިންމު ކަންކަމުގެ މައްޗަށް ވެސް އަލިއަޅުއްވާލާފައެވެ. އެގޮތުން ޑޮލަރުގެ ކަޅު ބާޒާރު ވަކި ބައެއްގެ އަތްމަތީގައި އޮތް އޮތުން ނިމުމަކަށް މިހާރު ގެނެސްފައިވާނެ ކަމަށް ރައީސް ވަނީ ވިދާޅުވެފައެވެ.
އަދި ފަލަސްތީނުގެ ރައްޔިތުންގެ ހައްގުގައިވެސް އެންމެ ކެރިގެން ވަކާލާތުކުރާ އެއް ގައުމަކަށް ރާއްޖެ ވާ ކަންވެސް ރައީސް ވަނީ ފާހަގަކުރައްވާފައެވެ. މީގެއިތުރުން މި އަހަރު ނިމުމުގެ ކުރިން 2 މިލިއަން ފަތުރުވެރިން ރާއްޖެ ގެނައުމުގެ އަމާޒަށްވެސް އަންނަ މަހު ވާސިލުވެވޭނެކަމަށް ވިދާޅުވެ ރައީސް ވަނީ މި އަހަރު އެކަނި 1984 ޓޫރިސްޓު ބެޑް އިތުރުކުރެވިއްޖެ ކަމަށް ވިދާޅުވެފައެވެ.
މިރޭގެ ޖަލްސާގައި ރައީސް ވަނީ ދައުލަތަށް ދިގު މުއްދަތަކަށް ހިދުމަތް ކުރެއްވި ބޭފުޅުންނާއި އެކި ކޯސްތަކުން މަތީ ދަރަޖަ ހާސިލުކުރި ފަރާތްތަކަށްވެސް އިނާމު ދެއްވާފައެވެ. މިރޭ އިނާމު ލިބިވަޑައިގެންނެވި ބޭފުޅުންގެ ތެރޭގައި 40 އަހަރަށްވުރެ ދިގު މުއްދަތެއްގައި ދައުލަތަށް ހިދުމަތްކުރެއްވި 11 ބޭފުޅުންނާއި އަދި 35 އަހަރަށްވުރެ ދިގު މުއްދަތަކަށް ހިދުމަތްކުރެއްވި 42 ބޭފުޅުން ހިމެނިވަޑައިގަންނަވައެވެ.
މީގެ އިތުރުން ވެސް މިރޭގެ ޖަލްސާގައި ރައީސް ވަނީ ވެހި ރާއްޖޭގެ ތައުލީމަށް ހިދުމަތް ކުރުމުގެ އެންމެ މަތިވެރި ޝަރަފު އިސްލާމީ ޔުނިވަސިޓީގެ ޗާންސެލާ އަދި ނިޝާން އިއްޒުއްދީނުގެ އިއްޒަތުގެ ވެރިޔާ މުހައްމަދު ޒާހިރު ހުސައިނަށް އަރުވާފައެވެ.
