އާބާދީގައި 500 މީހުން ހަމަނުވާ، 55 ރަށް ރާއްޖޭގައި އެބައޮތް ކަމަށާއި އެ ރަށްރަށުގެ މީހުން ތަރައްގީ ބޭނުންވާނަމަ އެހެން ގޮތްތަކެއް ހޯދަންޖެހޭ ކަމަށް ހައުސިން މިނިސްޓަރު އަލީ ހައިދަރު ވިދާޅުވެއްޖެއެވެ.
މިނިސްޓަރު ހައިދަރު ވިދާޅުވީރައްޔިތުންނަށް ބޯހިޔާވަހިކަން ހޯދައިދިނުމަށްޓަކައި އެއްފަސްކުރުމުގެ ޕްރޮގްރާމެއް ހިންގަންޖެހޭ ކަމަށެވެ.އެ މައްސަލައަށް ހައްލެއް ހޯދައިދިނުމަށްޓަކައި ސަރުކާރުގެ އަމާޒަކީ އާބަން ސެންޓަރުތަކެއް ގާއިމުކުރުންކަން ފާހަގަކޮށް މިނިސްޓަރު ވިދާޅުވީ ރާއްޖެގައި މީހުން ދިރިއުޅޭ 186 ރަށުގެ ތެރެއިން 55 ރަށަކީ 500 މީހުންވެސް ހަމަނުވާ ކުދި އާބާދީތައް ކަމަށެވެ.
އަސާސީގޮތުން ރައްޔިތުންނަށް ދޭންޖެހޭ އެތައް ހިދުމަތްތަކެއް އެރަށްތަކަށްވެސް ދޭންޖެހޭކަން ފާހަގަކޮށް މިނިސްޓަރު ވިދާޅުވީ އެއީ ކުދި އާބާދީތަކަކަށް ވިޔަސް އެ ރަށްތަކަށް ބޮޑެތި ހޭދަތަކެއް ދައުލަތުގެ ބަޖެޓުން ކޮންމެ އަހަރަކުވެސް ކުރަންޖެހޭ ކަމަށެވެ. އަދި ރައްޔިތުން ބޭނުންވާ ތަރައްގީ ރަށްތަކަށް ގެނެވޭނީ މަދު ރަށްތަކަކަށް އަމާޒުކޮށްގެން ތަރައްގީގެ މަޝްރޫއުތަކެއް ހިންގައިގެން، ދެވޭ ހިދުމަތުގެ ފެންވަރުވެސް ރަނގަޅުކޮށްގެންކަމަށް މިނިސްޓަރު ވިދާޅުވިއެވެ. އޭރުން އެކަމުގެ ފައިދާ މުޅި މުޖުތަމައަށް ލިބިގެންދާނެކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ އުތުރުގައި ތަަރައްގީކުރަން ނިންމާފައިވާ ނޮދަން އިންޓަގްރޭޓަޑް ޑިވެލޮޕްމަންޓް ޒޯނާއި ދެކުނުގައި ގާއިމުކުރާ ސަދަން އިންޓަގްރޭޓެޑް ޑިވެލޮޕްމަންޓް ޒޯނުގައި 55،000 މީހުންގެ އާބާދީއެއް އެބައޮތް ކަމަށެވެ. އަދި އެ ތަންތަން މާލެ އާއި އެއް ފެންވަރުގެ ހިދުމަތްތައް ލިބޭ ގޮތަށް ތަރައްގީކުރަންޖެހޭ ކަމަށް މިނިސްޓަރު ވިދާޅުވިއެވެ.
ސަރުކާރުން އާބަން ސެންޓަރުގެ ގޮތުގައި ތަރައްގީކުރާނެ ހަތް ސަރަހައްދު މިހާރު ވަނީ އިއުލާންކޮށްފައެވެ.
