އިހަވަންދިއްޕޮޅުގައި ތަރައްގީކުރާ މޯލްޑިވްސް އިކޮނޮމިކް ގޭޓުވޭ ޕްރޮޖެކްޓުގެ އަމަލީ މަސައްކަތް ކުރިއަށް އޮތް 6 މަސް ދުވަހުގެތެރޭގައި ފެށޭނެ ކަމަށް އިކޮނޮމިކް މިނިސްޓްރު މުހައްމަދު ސައީދު ވިދާޅުވެއްޖެއެވެ.
އިހަވަންދިއްޕޮޅުގައި ތަރައްގީކުރާ "މޯލްޑިވްސް އިކޮނޮމިކް ގޭޓުވޭ ޕްރޮޖެކްޓު"ގެ ޕޯޓު ތަރައްގީކުރުމާއި، މަޝްރޫއާ ގުޅުންހުރި އިތުރު މަސައްކަތްތައް ކުރުމަށް ސިންގަޕޫރުގެ ކެޕިޓަލް އޭޝިއާ އިންވެސްޓްމަންޓު ކުންފުންޏާއެކު ފްރޭމްވޯކް އެއްބަސްވުމެއްގައި ސޮއިކޮށްފައިވާއިރު، މިނިސްޓަރު ސައީދު ވިދާޅުވީ ފްރޭމްވޯކް އެގްރިމެންޓުގައި ސޮއިކުރުމާއެކު ކެޕިޓަލް އޭޝިއާ އިންވެސްޓްމަންޓު ކުންފުނީގެ ފަރާތުން މަސައްކަތްކުރިއަށް ގެންދާނެގޮތުގެ ތާވަލެއް އެކުލަވާލާނެ ކަމަށެވެ. އަދި ތަފްސީލީ އެގްރިމެންޓެއްގައިވެސް ކުރިއަށް އޮތް 6 މަސް ދުވަހުގެތެރޭގައި ސޮއިކުރެވޭނެ ކަމަށް މިނިސްޓަރު ވިދާޅުވިއެވެ.
މޯލްޑިވްސް އިކޮނޮމިކް ގޭޓުވޭ ޕްރޮޖެކްޓުގެ މަޝްރޫއުގެ ފުރަތަމަ ފިޔަވަހީގައި 100 މިލިޔަން ޑޮލަރުގެ އިންވެސްޓްމަންޓެއް ކެޕިޓަލް އޭޝިއާ ކުންފުނީގެ ފަރާތުން ކުރަން ނިންމާފައި ވާއިރު މި މަޝްރޫއަށް ފަންޑުކުރާނީވެސް ކެޕިޓަލް އޭޝިއާ ކުންފުނިންކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ ދަައުލަތުން ބުރައެއް ނަގަން ނުޖެހި، ޕްރައިވެޓް ޕަބްލިކް ޕާޓްނާޝިޕް މޮޑެލްގައި މި މަޝްރޫއު ކުރިއަށްގެންދާ އިރު، ކޮންފިޑެންސް ނުވަތަ ޔަގީންކަން ގެނައުމަކީ ކުރަން ޖެހޭ ކަމެއް ކަމަށެވެ. އަދި 100 މިލިޔަން ޑޮލަރުގެ މަޝްރޫއަކާއި ހަމައަށް ދެވުނީ ގިނަ މަސައްކަތްތަކެއް ކޮށްގެން ކަމަށް މިނިސްޓަރު ވިދާޅުވިއެވެ.
މޯލްޑިވްސް އިކޮނޮމިކް ގޭޓްވޭ މަޝްރޫއަކީ ރާއްޖޭގެ އިގްތިސޯދީ ރައްކާތެރިކަން ހަރުދަނާ ކުރުމަށް ބޭނުންވާ މުހިއްމު މަޝްރޫއުތައް ހިންގުމުގައި އިސްކޮށް ހަރަކާތްތެރިވުމަށް ސަރުކާރުގެ 5 ކުންފުންޏެއްގެ ހިއްސާ ހިމެނޭހެން މިއަހަރު ޖެނުއަރީ މަހުގެ ތެރޭގައި އުފެއްދި ކުންފުންޏެކެވެ.
