ދިވެހި ރާއްޖޭގެ ތައުލީމަށް ހިދުމަތް ކުރުމުގެ އެންމެ މަތިވެރި ޝަރަފު އިސްލާމީ ޔުނިވަސިޓީގެ ޗާންސެލާ އަދި ނިޝާން އިއްޒުއްދީނުގެ އިއްޒަތުގެ ވެރިޔާ މުހައްމަދު ޒާހިރު ހުސައިނަށް އެރުވުމަށް ނިންމައިފިއެވެ.
ރައީސް ޑރ. މުހައްމަދު މުއިއްޒު، ޒާހިރަށް މި ޝަރަފު އެރުވުމަށް ނިންމާފައިވަނީ ދިވެހިރާއްޖޭގެ ތައުލީމީ ތަރައްގީއަށާއި، ރާއްޖޭގައި ތައުލީމު ފުޅާކުރެއްވުމަށް ޒާހިރު ކޮށްދެއްވި މަސައްކަތްތަކުގެ އަގު ވަޒަން ކުރެއްވުމުގެ ގޮތުން ކަމަށް ރައީސް އޮފީހުން ވަނީ ބުނެފައެވެ. މީގެއިތުރުން ތައުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރެއްވުމަށް އިހުލާސްތެރިކަމާއެކު ގިނަ ހިދުމަތްތަކެއް ޒާހިރު ކޮށްދެއްވާފައިވާކަމަށްވެސް ރައީސް އޮފީހުން ވަނީ ބުނެފައެވެ.
ޒާހިރަށް މި ޝަރަފު އެރުވުމަށް ހަމަޖެހިފައިވަނީ ޖުމްހޫރީ ދުވަހުގެ މުނާސަބަތުގައި މާދަމާރޭ 8:15 ގައި ދަރުބާރުގޭގައި ބާއްވާ ރަސްމީ ޖަލްސާގައެވެ.
ދަރުބާރުގޭގައި ބާއްވާ މި ޖަލްސާގައި މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ހާއްސަ އިނާމު ދެއްވުންވެސް އޮންނާނެއެވެ. ރައީސުލްޖުމްހޫރިއްޔާ ދެއްވާ ހާއްސަ އިނާމު މި އަހަރު 40 ފަރާތަކަށް ދިނުމަށް ހަމަޖެހިފައިވާ ކަމަށް ރައީސްއޮފީހުން ވަނީ ބުނެފައެވެ. މި އިނާމު ލިބޭ ފަރާތަތްކަުން ކަނޑައަޅާފައިވަނީ ހާއްސަ އިނާމާބެހޭ ކޮމިޓީ އަކުންނެވެ.
މީގެއިތުރުން މި ޖަލްސާގައި ދައުލަތަށް ހިދުމަތްކުރުމުގެ އިނާމުވެސް 53 ފަރާތަކަށް ދިނުމަށް ވަނީ ހަމަޖެހިފައެވެ.
ދައުލަތަށް ހިދުމަތް ކުރުމުގެ އިނާމަކީ، ދިވެހި ދައުލަތަށް 35 އަހަރަށް ވުރެ ދިގު މުއްދަތަކަށް ހިދުމަތް ކޮށްފައިވާ މުވައްޒަފުންގެ ތެރެއިން، މަގާމުގެ މަސްއޫލިއްޔަތު އަދާކުރުމުގައި ގާބިލުކަމާއި އިހްލާސްތެރިކަމާ އެކުގައި ކޮށްފައިވާ ހިދުމަތްތަކަށާއި، އެ މުއައްސަސާއެއްގެ ކުރިއެރުމަށް ކޮށްދީފައިވާ ހިދުމަތްތަކުގެ އަގުވަޒަން ކުރުމުގެ ގޮތުން ގައުމީ ފެންވަރުގައި ދިވެހި ދައުލަތުން ރައީސުލްޖުމްހޫރިއްޔާ ދެއްވާ އެންމެ ޝަރަފުވެރި އިނާމެވެ.
ދިވެހި ދައުލަތަށް ހިދުމަތް ކުރުމުގެ އިނާމުގެ ގޮތުގައި ރައީސުލްޖުމްހޫރިއްޔާ ދެއްވާނީ އައްޑަނައަކާއި، ޝަރަފުގެ ބެޖަކާއި، ހަނދާނީ ލިޔުމެކެވެ.
