ރާއްޖެއަށް މަސްތުވާތަކެތި އެތެރެކުރުމުގެ ކުށުގައި ހައްޔަރު ކުރި އުމުރުން 65 އަހަރުގެ ސ. ހިތަދޫ، ވެހެތާނުގެ، އަބްދުﷲ ސޯދިގުގެ ލަގެޖުން 270 ގްރާމްގެ ހެރޮއިން ފެނުނީ މާ ޖަހާފައިވާ ޓުކުރި ތަކެއްގެ ތެރޭގައި ފޮރުވާފައި ހުއްޓާ ކަމަށް ކްރިމިނަލް ކޯޓުން ނެރުނު އަމުރުގައި ބުނެފިއެވެ.
މަސްތުވާތަކެއްޗާއެކު ސޯދިގު ހައްޔަރު ކޮށްފައި ވަނީ މިދިޔަ ސެޕްޓެމްބަރު މަހުގެ 17 ވަނަ ދުވަހު ވެލާނާ އިންޓަނޭޝަނަލް އެއާޕޯޓުންނެވެ. ތައިލޭންޑުން ރާއްޖެއަށް އައި ސޯދިގް ހައްޔަރު ކުރުމަށް ފަހު މިއަދާ ހަމައަށް ވަނީ ހަތަރު ފަހަރަށް އޭނާގެ ބަންދުގެ މުއްދަތު ޖަހާފައެވެ.
ސޯދިގުގެ ބަންދުގެ މުއްދަތު:
- ސެޕްޓެމްބަރު 18 އިން އޮކްޓޯބަރު 3 އަށް 15 ދުވަހުގެ ބަންދު
- އޮކްޓޯބަރު 3 އިން އޮކްޓޯބަރު 23 އަށް 20 ދުވަހުގެ ބަންދު
- އޮކްޓޯބަރު 24 އިން ނޮވެމްބަރު 8 އަށް 15 ދުވަހުގެ ބަންދު
- ނޮވެމްބަރު 8 އިން ނޮވެމްބަރު 28 އަށް 20 ދުވަހުގެ ބަންދު
މިއަދު އޭނާގެ ބަންދުގެ މުއްދަތު އިތުރުކުރުމަށް ފަހު ކޯޓުން ނެރުނު އަމުރުގައި ބުނެފައިވާ ގޮތުގައި އޭނާގެ މައްޗަށް ތުހުމަތުކޮށްފައިވާ ރާއްޖެއަށް މަސްތުވާތަކެތި އެތެރެކުރުމުގެ ކުށް ކުރިކަމަށް ތުހުމަތު ކުރެވޭ މިންވަރަށް ހެކި ހުށަހަޅާފައި ވެއެވެ.
އެގޮތުން އޭނާގެ ލަގެޖުގެ ގޮތުގައި ގެންގުޅުނު ފޮށި ބަލައި ފާސްކުރި އިރު އެ ލަގެޖް ތެރޭގައި މާ ޖަހާފައި އޮތް ތިން ޓުކުރިއެއްގެ ތެރެއިން މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި 4 ރަބަރު ޕެކެޓް ފެނިފައި ވެއެވެ. އެތަކެތީގެ ވަގުތީ ބަރުދަނުގައި 270 ގްރާމް ހުރި ކަމަށް ދައްކާ ކަމަށް އެ އަމުރުގައި ބުނެފައި ވެއެވެ. ހަމައެއާއެކު އޭނާގެ ކުޑަކަމުދާ ތަކެތި އޯޕީއޭޓްސް އަށް ޕޮސިޓިވްވެފައިވާ ކަމަށް ވެސް އަމުރުގައި ބުނެފައި ވެއެވެ.
270 ގްރާމްގެ ހިރޮއިން ރާއްޖެއަށް އެތެރެކުރަން އުޅުނު މި މީހާ އަކީ ބަންދުގެ ރެކޯޑް ވެސް އޮތް މީހެކެވެ. މި މީހާގެ ބަންދުގެ މުއްދަތް ދެވަނައަށް ޖެހި އަމުރުގައި ބުނެފައިވާ ގޮތުގައި، އެ ލަގެޖް ހަވާލު ކުރަން ޖެހޭ މީހާއާ ވެސް ސޯދިގް މުއާމަލާތްކޮށްފައިވާ ކަން ވަނީ ތަހުގީގަށް އެނގިފައެވެ. އަދި އެ މުއާމަލާތްތަކުން މިއީ ސޯދިގަށް އެނގިގެން ހިންގާފައިވާ އަމަލެއްކަން ވެސް އެނގޭ ކަމަށް އެ އަމުރުގައި ބުނެފައި ވެއެވެ.
ސޯދިގްގެ އިތުރުން ވެސް މިދިޔަ ސެޕްޓެމްބަރު މަހުގެ 16 ވަނަ ދުވަހު، އުމުރުން 65 އަހަރުގެ ދުވަސްވީ ދިވެއްސެއް 349 ގްރާމްގެ މަސްތުވާތަކެއްޗާއެކު ވަނީ ހައްޔަރުކޮށްފައެވެ. މި މީހާ ރާއްޖެ އައިސްފައި ވަނީ ސްރީ ލަންކާއިންނެވެ.
