ހުޅުމާލެ ހިޔާ ފްލެޓުގެ އެޕާޓްމަންޓެއްގައި ރަހީނުކޮށްފައި ހުރި މީހާ ސަލާމަތް ކުރެވުނީ އެމީހާގެ ބޯ ބާލުވައި، އިނގިލި ބުރިކޮށްލަން މަސައްކަތް ކުރަމުންދަނިކޮށް ކަމަށް ފުލުހުން ބުނެފިއެވެ.
ފުލުހުން ބުނީ ގޭންގްއަކުން މީހަކު ރަހީނުކޮށް ހިޔާ ސަރަހައްދުގެ ޓަވަރަކަށް ގެންގޮސްފައިވާ ކަމުގެ މައުލޫމާތު ރޭ 8:00 ހާއިރު ފުލުހުންގެ އިންޓެލިޖެންސްއަށް ލިބުނު ކަމަށެވެ.
އެއާއެކު އެ މީހާ ހޯދުމުގެ މަސައްކަތް ފުލުހުން ފަށާފައި ވާއިރު، އެ މީހާ ރަހީނުކޮށްފައި ހުރީ H9 ޓަވަރުގައިކަން އެގުމާއެކު އެތަނަށް ފުލުހުން ވަނީ ގޮސްފައެވެ. އެ މީހާ ރަހީނުކޮށްފައި ހުރީ H9 ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމެންޓްގައެވެ.
ފުލުހުން ބުނީ އެ އެޕާޓްމެންޓްއަށް ފުލުހުން ވަނީ އެޕާޓްމެންޓްގެ ދޮރު ވައްޓާލައިގެން ކަމަށެވެ. އަދި ފުލުހުން ވަން އިރު، ރަހީނުކުރި މީހާގެ ބޯ ބާލުވާފައިވާ ކަމަށާއި، އޭރު އެމީހާގެ އިނގިލި ބުރިކޮށްލަން މަސައްކަތް ކުރަމުންދިޔަ ކަމަށް ފުލުހުން ބުނެއެވެ.
މި މައްސަލައާ ގުޅިގެން 12 މީހުން ފުލުހުންގެ ބެލުމުގެ ދަށަށް ގެންގޮސްފައި ވާއިރު، އެ 12 މީހުންގެ ބައިވެރިވުން މިކަމުގައި އޮތް ކަމަށް ބެލެވޭ ކަމަށް ފުލުހުން ވަނީ ބުނެފައެވެ. އަދި އެކަން ޔަގީން ކުރެވިގެން ދާނީ ތަހުގީގު ކުރިއަށްދާ މިންވަރަކުން ކަމަށް ވެސް ފުލުހުން ބުނެއެވެ.
ފުލުހުން އެ އެޕާޓްމެންޓްއަށް ދިޔައިރު ވެސް އެ ތަނުގައި މަސްތުވާތަކެތި ހުރި އިރު، އެތަނަކީ މަސްތުވާތަކެތި ބޭނުންކޮށް އަދި އެތަކެތީގެ ވިޔަފާރި ކުރަމުންދާ ތަނެއް ކަމަށް ބެލެވޭ ކަމަށް ފުލުހުން ބުނެފައިވެއެވެ.
