ލ. އަތޮޅުގައި އޮންނަ އޮޅުވެލި ރިސޯޓްގެ ފަޅުން ބައެއް، ކައިރީގައި އޮންނަ މާމެންދޫގެ އިހްތިސޯސްގެ ތެރެއަށް ވަންނާތީ، އެކަން އިސްލާހުކޮށް ގެޒެޓުކޮށްފިއެވެ.
އެމްޑީޕީ ސަރުކާރުން ރަށްރަށުގެ އިހްތިސޯސް ކަނޑައެޅި އިރު، ރިސޯޓުގެ ސަޕްލައި ޖެޓީ އާއި ޓޫރިސްޓުން ގޮވައިގެން ފީނަން ދާ ސަރަހައްދު އޮންނަނީ މާމެންދޫގެ އިހްތިސޯސްގެ ތެރޭގައެވެ. އެހެންކަމުން އެކަން އިސްލާހު ކުރުމަށް މާމެންދޫ ކައުންސިލުން އެދިފައިވާތީ މާމެންދޫގެ އިހްތިސޯސްއިން އެބައި އުނިކޮށްފައިވަނީ، ރައީސް ޑރ. މުހައްމަދު މުއިއްޒު ނެރުއްވި ރިޔާސީ ގަރާރަކުންނެވެ.
ސިކްސް ސެންސަސް އިން ހިންގާ އެ ރިސޯޓުން މާމެންދޫގެ އިހްތިސޯސްގެ ތެރޭގައި ހިމެނޭ ސަރަޙައްދު ބޭނުންކުރާތީ މިދިޔަ މޭ މަހުން ފެށިގެން ރިސޯޓުން މަހަކު 1،800 ޑޮލަރު މާމެންދޫ ކައުންސިލަށް ދައްކަމުން އައިސްފައިވެއެވެ.
މާމެންދޫގެ އިހްތިސޯސްއިން އެބައި އުނިކުރުމާއެކު މިހާރު އެރަށުގެ އިހްތިސޯސްގެ ތެރޭގައި އޮތީ، އެ ރަށް ކައިރީގައި އޮންނަ ފަޅުރަށެއް ކަމުގައިވާ ހުޅިމެންދޫއެވެ.
