ރާއްޖޭގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރި މީހަކު 23 އަހަރަށް ޖަލަށްލުމަށް ހުކުމްކޮށް 400،000 ރުފިޔާއިން ޖޫރިމަނާކޮށްފިއެވެ.
ކްރިމިނަލް ކޯޓުން ހުކުމްކޮށްފައިވަނީ ހ. ބްލޫބާޑްގެ، ހުސެއިން އަބްދުﷲ ގެ މައްޗަށެވެ.
ކޯޓުން ކުރި ހުކުމުގައި ބުނެފައިވަނީ، މިދިޔަ އަހަރު މަސްތުވާތަކެތީގެ ވިޔަފާރިކުރުމަށް ހުސެއިން ކުއްޔަށް ހިފައިގެން އުޅުނު ގ.ކޯޒީގެ ދެވަނަ ފަންގިފިލާ ބަލާ ފާސްކުރުމުގެ ތެރެއިން 75 ގްރާމަށްވުރެ ގިނަ ޑައިމޯފިން ފެނިފައިވާކަމަށެވެ. އަދި ގެއިން 283،500 ރުފިޔާ ފެނުނު ކަމަށްވެސް ކޯޓުގެ ހުކުމުގައިވަނީ ބުނެފައެވެ.
މީގެ އިތުރުން އެ ހުކުމުގައި ބުނެފައިވަނީ އެއީ ކިހިނެއް ހޯދި ފައިސާއެއްކަން އޭނާއަށް ބުނެދެވިފައި ނުވުމާއެކު އެއީ މަސްތުވާތަކެތީގެ ވިޔަފާރިކޮށްގެން ލިބޭ ފައިސާކަމަށް ބެލެވޭކަމަށެވެ. އެހެންކަމުން މި މައްސަލައިގައި ހުށަހަޅާފައިވާ ހެއްކައް ރިއާޔަތްކޮށް ކްރިމިނަލް ކޯޓުން ވަނީ ހުސެއިން މަސްތުވާތަކެތީގެ ވިޔަފާރިކުރިކަން ސާބިތުވާކަމަށް ހުކުމްކޮށްފައެވެ.
އެ މައްސަލައިގައި 400،000 ރުފިޔާއިން ޖޫރިމަނާކޮށް މި މަހުގެ 5 ވަނަ ދުވަހުން ފެށިގެން 12 ދުވަސް ތެރޭގައި އެ ފައިސާ މީރާއަށް ދައްކަން ވަނީ ހުކުމްކޮށްފައެެވެ. މީގެ އިތުރުން 25 އަހަރަށް ޖަލަށް ލާންކުރި ހުކުމުގައި އިތުރަށް ބުނެފައިވަނީ އޭނާ ޖަލު ބަންދުގައި މިހާތަނަށް ހޭދަކުރި މުއްދަތަށް ބަލައި ދެން ޖަލުގައި ހޭދަކުރަން ޖެހޭނީ 23 އަަހަރާއި ދެ މަހާއި 25 ދުވަސްކަމަށެވެ.
