މީގެ ކުރިންވެސް މީހަކަށް މަރުގެ އިންޒާރުދިން މައްސަލައެއްގައި ބަންދުކޮށްފައިވާ މީހަކު، އަނެއްކާވެސްކުރީގެ ލޯބިވެރިޔާއަށް އަނިޔާކުރި ކަމުގެ ތުހުމަތުގައި ހައްޔަރުކޮށްފިއެވެ.
މި މައްސަލައިގެ ތުހުމަތުގައި ހައްޔަރުކޮށްފައިވަނީ ގއ. ވިލިނގިލި، ނައިންފުލާވަ، އީމާން މުހައްމަދު(28އ)އެވެ.
2020 ވަނަ އަހަރުވެސް އެއް ކިލޯގެ މަސްތުވާތަކެތީގެ މައްސަލެއްގައި އީމާން ބަންދުކޮށްފައިވާއިރު، މީގެ ކުޑަ ދުވަސްކޮޅެއް ކުރިން ގުރޫޕު ހަދައިގެން މާރާމާރީ ހިންގުމާއި ބިރުދެއްކުމާ، އިންޒާރު ދިން މައްސަލައިގައިވެސް އޭނާ ހައްޔަރުކޮށްފައިވެއެވެ.
މިފަހަރު ލޯބިވެރިޔާއަށް އަނިޔާކުރިކަމުގެ ތުހުމަތުގައި އޭނާ ހައްޔަރުކޮށް 15 ދުވަސް ބަންދަށް ޖަހާފައިވާއިރު ކޯޓުން ނެރުނު ބަންދު އަމުރުގައި އޭނާ ދީފައިވާ އަނިޔާތައް ވަނީ ފާހަގަކޮށްފައެވެ.
އެގޮތުން އެ އަނިޔާތަކުގެ ތެރޭގައި އަންހެން ކުއްޖާގެ ތުންފަތް ފަޅައިގެން ދިޔުމުގެ އިތުރުން، އިނގިލިތައް ރަތްވެ، ފައިގެ ފަލަމަސްގަނޑުން އެކިތަންތަން ނޫފައިގަތުން ހިމެނެއެވެ. އަދި ބުރަކަށި ރަތްވެފައި ހުރި ކަމަށް ބަންދު އަމުރު ގައި ބުނެފައިވާއިރު މި އަމަލުތަކަކީ ގެވެށި ގުޅުމެއްގެ ތެރެއިން ހިނގާފައިވާ އަމަލުތަކެއްކަން ބަންދު އަމުރުގައި ފާހަގަކޮށްފައިވެއެވެ.
